Putin busca a reelección nos comicios presidenciais que rematan o domingo

Até 93.644 colexios electorais abriron a sexta feira as súas portas ao longo do territorio ruso na primeira xornada de votación das eleccións presidenciais, que rematarán o domingo, e á que están convocadas 112 millóns de persoas no país e case dous millóns nos 295 centros electorais na emigración. As primeiras horas das votacións rexistraron unha importante afluencia, e arredor de 9% do electorado xa depositara o seu sufraxio ás 14 horas de Moscova (12 horas na Galiza), no medio dun amplo dispositivo policial despregado tras as advertencias dos Estados Unidos ou o Reino Unido de posíbeis ataques terroristas, dos intentos de sabotaxe e ataques ucraínos e dos intentos de incursión nos últimos días, protagonizados por organizacións rusas de extrema dereita aliadas con Ucraína, país que usan como base. Pouco antes da apertura das urnas, as autoridades rusas confirmaron que detiveron unha persoa que programaba cometer un atentado terrorista en Briansk, perto da área fronteiriza con Belarús e Ucraína, afirmando que foi recrutado por Kíiv. As sondaxes apuntan a que o actual mandatario, Vladimir Putin, que se presenta como independente, será reelixido con máis de 80% das papeletas nos oitavos comicios presidenciais rusos, superando Nikolai Kharitonov, candidato do Partido Comunista, e Vladislav Davankov, da conservadora Xente Nova, que ficarían con 6%, por diante do tamén conservador Leonid Slutsky, do Partido Liberal-Demócrata (5%). Outras candidaturas, como a do crítico coa guerra en Ucraína Boris Nadezhdin, non foron aceptadas polos organismos electorais. Sexa como for, o independente Centro Levada sitúa a aprobación popular ao labor de Putin en 86%, polo que todo indica que non será necesaria unha segunda volta electoral, que tería que decorrer se ningunha candidatura obtén máis da metade dos votos. No caso de facerse cun novo mandato de seis anos, Putin estenderase máis de dúas décadas no poder logo de asumir a Presidencia o último día do século XX e imporse nas presidenciais de 2000 e 2004. Entre 2008 e 2012, desempeñouse como primeiro ministro co seu aliado Dmitri Medvedev como mandatario, antes de vencer nas votacións dese ano e recuperar o cargo, que mantivo nas eleccións de 2018. En 2020, un referendo aprobou unha reforma constitucional que o permitiu optar a dous mandatos presidenciais consecutivos máis. Nese sentido, as críticas estadounidenses centráronse nos colexios electorais en Donetsk, Luhansk, Khersón e Zaporijia, adheridos a Moscova após referendos non recoñecidos pola Organización das Nacións Unidas (ONU), subliñando que non recoñecerán a lexitimidade da votación neses territorios, que “non pode reflectir a libre vontade dos cidadáns de Ucraína que se ven obrigados a votar”, algo que tamén cuestionou António Guterres, secretario xeral da ONU. 4,5 millóns de persoas poden votar nesas áreas. Pola súa parte, Rusia acusou o país americano de intentar inxerir nos comicios para diminuír a participación, así como de preparar ciberataques contra o seu sistema de votación electrónica. A economía impulsa Putin Un dos factores detrás da popularidade de Putin é a situación da economía rusa, admite a axencia AP, recalcando que “as finanzas estatais son máis sólidas do que moitos agardaban”. A pesar das sancións coercitivas aplicadas por Estados membros ou da contorna da Organización do Tratado do Atlántico Norte (OTAN), implementadas por un cuarto dos países do mundo, o Fondo Monetario Internacional (FMI)prevé un crecemento este ano de 2,6%, moi por riba do 0,9% estimado na Unión Europea (UE) e superando en medio punto ao de Washington. Ao tempo, a taxa de desemprego está por baixo de 3%, cun gasto público que duplica as cifras de 2018. Iso si, a inflación, en 7%, segue máis alta que o obxectivo fixado polo banco central, que aspira a reducila até 4%. Non obstante, o país lanzou unha batería de medidas neste sentido, indica Janis Kluge, experto en economía rusa do Instituto Alemán para Asuntos Internacionais e de Seguridade. Amais de incrementar a 16% a taxa de xuro, o Executivo de Putin exixiu ás empresas exportadoras que transformen a rublos os seus ingresos en divisas e prohibiu as exportacións de gasolina medio ano para controlar os prezos no mercado interno. Tamén está a impulsar o sector da construción con hipotecas subsidiadas cunha taxa de xuro moi baixa. As sancións si que implicaron a desaparición do país de boa parte das marcas occidentais, o que non evita que en última instancia se poidan adquirir esas mercadorías, e foron substituídas por produtores locais, despois de aumentar Rusia a súa produción propia en ámbitos como os alimentos após o veto a determinadas importacións en contestación ás sancións occidentais pola incorporación de Crimea á Federación en 2014 por medio dun plebiscito. “Desde o comezo do capitalismo en Rusia, experimentamos no mínimo catro crises importantes, estamos acostumados aos problemas e, para ser honesto, estes non son os peores que enfrontamos”, detallara á canle France 24 Yuri Saprigin, empresario de Kaluga, unha cidade localizada no oeste ruso. A UE mercou 190.000 millóns de euros en combustíbeis Desde a invasión rusa de Ucraína, Moscova vendeu 620.000 millóns de euros en combustíbeis fósiles. Deles, case 190.000 millóns de euros só á UE, recollen os datos do Centro de Investigación sobre Enerxía e Aire Limpo. Estas cifras constitúen para Janis Kluge un dos elementos chave da situación da economía rusa. David Teurtrie, experto en Rusia e docente do Instituto Católico de Vendée, explicara que o país aínda contaba con marxe para afrontar as sancións, como enormes reservas financeiras e “unha débeda relativamente baixa, que lle ofrece unha importante capacidade de endebedamento”. A débeda externa rusa atópase por debaixo de 15% do produto interior bruto, entrementres, nos Estados Unidos excede de 120%. Protesta por Navalni Yulia Navalnaya, viúva de Alexei Navalni, considerado por Occidente como o principal opositor a Putin e que faleceu nunha prisión rusa en febreiro, fixo un chamamento a protestar ao mediodía do último día das eleccións votando por calquera candidatura agás a de Putin ou anulando o voto. En paralelo, varias persoas foron detidas tras verter líquidos como tinta ou pintura nas urnas de distintos colexios electorais. A Comisión Electoral Central asegurou que recoñeceron telo feito “por cartos”.