A cinco semanas da votación do próximo 1 de outubro, o presidente da Generalitat, Carles Puigdemont, avanzou onte no xornal Financial Times que o Govern xa dispón das urnas precisas para desenvolver a xornada electoral. “Temos máis de 6.000 urnas, non vexo como o Estado pode detelo [o referendo]”, declara Puigdemont no xornal británico segundo recollen hoxe medios cataláns.
“Non quero ir ao cárcere, pero non hai nada que me poidan facer para deter este referendo”, advirte o presidente catalán na entrevista e responde a crítica lanzada contra o Govern despois dos atentados da semana pasada desde medios españois que aproveitaron para pedir que non se celebre o referendo. A votación, asegura Puigdemont, levarase a cabo e “volver á normalidade será derrotar aos terroristas”.
Ás seis de esta tarde, nos xardíns de Gracia, comezará a manifestación de condena dos atentados baixo unha única pancarta co lema 'No tinc por' (Non teño medo) en dezasete idiomas.
