luns 06/12/21

Presentan un acordo de Goberno en Alemaña. Scholz será chanceler

O SPD gobernará esta lexislatura cos Verdes e o FDP após un acordo de Goberno negociado nos últimos dous meses, o que converterá o socialdemócrata Scholz no vindeiro chanceler en substitución de Angela Merkel.
Olaf Scholz, no centro, novo chanceler. (Foto: Kay Nietfeld / dpa)
Olaf Scholz, no centro, novo chanceler. (Foto: Kay Nietfeld / dpa)

Apenas 48 horas antes de que se fixeran dous meses das eleccións federais do 26 de setembro en Alemaña, representantes do Partido Socialdemócrata (SPD), Os Verdes e o Partido Liberal (FPD), anunciaron esta cuarta feira que chegaron a un acordo de Goberno para formar a denominada coalición semáforo -polas cores das formacións-.

O pacto converterá o socialdemócrata Olaf Scholz no vindeiro chanceler alemán nunha sesión no Bundestag (Parlamento) o vindeiro 6 de decembro, en substitución de Angela Merkel, que ocupou o cargo os últimos 16 anos.

O ascenso do SPD chega despois do derrubamento electoral da CDU/CSU, a forza conservadora á que pertence Merkel, coa que compartiron Goberno. A pesar da caída, mantivéronse a menos de dous puntos do SPD. 25,74% contra 24,07%.

A inédita coalición terá como vicechanceler a Robert Habeck, dos Verdes, que obtiveron o terceiro posto co 14,75% dos sufraxios, segundo informou a canle Ntv.

Repartimento de carteiras

No que atinxe ao repartimento de carteiras, o SPD queda con Saúde, Vivenda, Interior, Traballo e Asuntos Sociais, anunciou o medio público ARD, mentres Os Verdes fanse co macroministerio de Economía e Medioambiente, e máis co de Exteriores. O último socio do acordo, o FDP, xestionará o Ministerio de Finanzas, Xustiza, Transportes e Educación, após facerse co 11,46% dos votos.

O documento ratificado polas negociadoras e negociadores das tres formacións políticas ten que ser aprobado aínda pola dirección dos partidos. SPD e FDP farano nun congreso a comezos de decembro, ao tempo que Os Verdes consultan coa militancia.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Punto de inflexión

Os medios alemáns destacaron a celeridade do acordo, que chega máis cedo que nos dous anteriores períodos lexislativos, así como o bo ambiente e a lealdade coa que se desenvolveron as negociacións; un dos principais integrantes do diálogo confesou a Deutsche Welle que supón “un punto de inflexión para a cultura política” do país.

Despois do resultado das eleccións lexislativas en setembro, as únicas posibilidades para formar un Goberno pasaban pola coalición que se vén de acordar ou polo retorno a un Executivo entre SPD e CDU/CSU, mais nesta ocasión liderado polos socialdemócratas, após rexeitar Os Verdes e o FDP que os conservadores mantiveran a cabeza do gabinete.

Presentan un acordo de Goberno en Alemaña. Scholz será chanceler
comentarios