Un axente federal dos EUA matou nas últimas horas un home sospeitoso de asasinar un seguidor do presidente estadounidense, Donald Trump, durante un enfrontamento rexistrado a pasada fin de semana en Port-land (Oregon) no contexto das protestas contra o racismo.
Segundo os diarios The Washington Post e The New York Times, que citaron fontes oficiais, o falecido, identificado como Michael Forest Reinoehl, foi abatido na localidade de Lacey, no Estado de Washington, cando un grupo de axentes federais procedían á súa detención. O axente federal disparou a Reinoehl cando este "sacou unha pistola", dixo ao Post unha fonte do Departamento de Xustiza.
Reinoehl, de 48 anos e vinculado ao movemento anarquista Antifa, estaba a ser investigado ─aínda que non estaba formalmente acusado─ de matar de dous disparos a Aaron J. Danielson, de 39, un seguidor de Trump e membro do movemento de ultradereita Patriot Prayer, que se enfrontou cos manifestantes en Portland contra a inxustiza racial.
Pouco despois de o New York Times publicar a información sobre a morte de Reinoehl, Trump escribía precisamente sobre ese caso nas redes sociais, mais aparentemente sen ter aínda constancia da noticia, dado que se preguntaba no Twitter "por que a Policía de Portland non arresta o asasino a sangue frío de Aaron Jay Danielson".
"Defensa propia"
Nunha entrevista publicada na quinta feira polo medio Vice News, Reinoehl parecía admitir que matara a Danielson, dado que aseguraba que "non tiña outra opción" e que actuou en defensa propia, porque cría que o seguidor de Trump os ía apuñalar a el e mais a un amigo.
"Podería terme quedado sentado e ver como mataban un amigo meu doutra raza. Mais non ía facer iso", afirmou o finado Reinoehl, que era branco.
O activista de esquerdas, que se definiu a si mesmo como "100% de Antifa", acudiu frecuentemente ás protestas deste verán en Portland, unha das cidades onde houbo unha mobilización máis activa e ás veces violenta contra o racismo tras homicidio de George Floyd.
A Policía de Portland asegurara tamén na quinta feira que seguía investigando o incidente, que se produciu logo de unha caravana de simpatizantes de Trump e de Patriot Prayer percorrer Portland na fin de semana e se enfrontar cos manifestantes contra o racismo, aos que dispararon con perdigóns.
