O ataque lanzado esta madrugada pola resistencia palestina chega após un ano de bombardeos intermitentes por parte do Goberno de Netanyahu. Segundo as fontes israelitas, a acción de Hamas só deixou un civil morto.
A última escalada de tensión produciuse hai menos dun mes, cando unha protesta na fronteira que separa Gaza de Israel acabou coa morte de cinco palestinos e con máis de 20 manifestantes feridos.
O bombardeo e a ofensiva das milicias palestinas foi cualificado por Hamás como o inicio dunha "revolución" que nace como unha resposta a un ano no que Netanyahu intensificou a violencia.
Os militantes palestinos conseguiron tamén penetrar no interior do cárcere israelí de Ashkelón, onde liberaron a ducias de presos políticos palestinos. Na mesma dirección, os responsábeis de Hamas avanzaron accións semellantes noutros cárceres de Israel.
Hamas
Saleh al Arouri, o máximo responsábel da estrutura militar de Hamas, chamou a loita para liberar aos militantes palestinos encarcerados nas prisións sionistas. Ao tempo, lembrou as continúas “agresións de Israel contra o noso pobo”
O Goberno hebreo anunciou a operación "espadas de ferro" destinada a bombardear unha parte dos territorios ocupados de Palestina. Neste sentido, os voceiros militares avanzaron que que “o Exército israelí declara o estado de alerta de guerra"
O ministro de Defensa culpou a Hamas do acontecido. Nesta liña, asegurou que “Hamas cometeu un grave erro lanzando unha guerra contra o Estado de Israel”. Neste liña, denunciou un masivo ataque da resistencia palestina.
O máximo responsábel militar de Israel continuou indicando que “as tropas do Exército israelí están a pelexar contra o inimigo en calquera lugar. Pido a todos os cidadáns de Israel que sigan as instrucións de seguridade. O Estado de Israel gañará esta guerra”.
