Infancia secuestrada en Palestina

Os dereitos universais das crianzas palestinas son violados de maneira sistemática por parte do Estado de Israel con total e absoluta impunidade. A infancia palestina está marcada pola violencia da ocupación sionista: nenos e nenas son testemuñas e vítimas de operacións militares, arrestos aleatorios e procesos de detención en prisións israelís. Crianzas en prisión Desde o ano 2000 máis de 15.000 crianzas palestinas foron arrestadas polas forzas de seguridade israelí en Cisxordania, Gaza e Xerusalén Leste. Cada ano estímase que hai entre 500 e 1.000 menores en centros de detención militar en Israel, dos cales máis de 90% son varóns e case un 80% residentes na cidade de Xerusalén. O seu delito máis común: lanzar pedras ao Exército israelí, penado con até 20 anos en prisión. Actualmente, dos 5.200 prisioneiros palestinos, 170 son menores de idade e 29 teñen menos de 12 anos. Nenos e nenas son vítimas de abusos físicos e emocionais tanto no momento do seu arresto e interrogación como durante todo o período de detención. Segundo o último informe de Save the Children, as crianzas palestinas son sometidas a diferentes formas de tortura: 8 de cada 10 son golpeadas e 7 de cada 10 son forzadas a se espiren durante o arresto. Tamén poden presentar feridas de bala e fracturas causadas polas brutais malleiras por parte dos soldados. Moitos dos interrogatorios non son gravados e adoitan ter lugar sen a presenza dun avogado ou dun acompañante adulto, baixo ameazas e insultos de toda índole (tamén sexual). Arrestados sen probas, os tribunais militares ditan sentenzas en base ao testemuño dos soldados. As crianzas palestinas de máis de 16 anos son condenadas como adultos, tendo en conta a idade no momento da sentenza, non do momento do suposto delito. O Sistema Penitenciario de Israel denega de forma deliberada a asistencia médica ou ofrece unha atención sanitaria precaria. Ademais, non se toman medidas suficientes para asegurar unha boa hixiene persoal e pública. Con frecuencia, o persoal médico de prisión é cómplice do sistema sionista de apartheid e nos seus informes non hai constancia das feridas provocadas como consecuencia das torturas físicas que os nenos e nenas sofren en prisión. Non só a saúde se ve afectada, tamén o acceso á educación. Os adolescentes de entre 16 e 18 anos -o grupo máis numeroso-, non ten dereito a ningún tipo de ensino, por seren considerados adultos. Os menores de 16 anos só teñen algunhas clases de matemáticas e de humanidades, xa que por razóns de seguridade está prohibido impartir aulas de relixión, xeografía e historia. Con todo, só hai profesores en dúas prisións: Megido e Rimomim. En Megido as clases son no patio durante todo o ano, á intemperie. Ademais, non se segue o programa do sistema educativo da Autoridade Palestina e dentro do cárcere non está permitido que os estudantes de último ano se matriculen para o tawjihi (o exame para obter o Certificado de Educación Secundaria en Palestina). Unha vez que son postas en liberdade moitas crianzas non continúan os seus estudos. Estímase que hai entre 500 e 1.000 menores en centros de detención militar en Israel As familias atravesan moitas dificultades para poder levar a cabo visitas de forma regular. No caso das persoas residentes en Cisxordania, teñen que solicitar permisos especiais para se desprazaren aos territorios de Israel. Por cuestións de seguridade estas autorizacións acostuman ser denegadas. Os palestinos que viven en Gaza non teñen posibilidade de facer visitas e tampouco poden manter contacto por chamada telefónica. A única forma de comunicarse cos seus familiares é a través de cartas, que demoran moito debido aos estritos controis de seguridade e censura. Desprovistas de protección, seguridade, familia e amor, as crianzas palestinas en prisión son privadas dunha infancia digna e propicia para o bo crecemento físico e psicolóxico. Ahmed Manasra, arrestado en 2015 con tan só 13 anos, é un dos exemplos de infancia truncada e secuestrada polo Estado de Israel. Tras unha violenta interrogación baixo insultos e sen avogado foi acusado de acoitelar a dous cidadáns israelís en Xerusalén Leste e condenado a nove anos e dez meses de prisión. Desde o ano 2021 está baixo réxime de illamento e foi diagnosticado con esquizofrenia, psicose e depresión grave. Israel xustifica os arrestos e detencións de menores como resposta a posibles perigos terroristas. Crianzas asasinadas Nos últimos dous anos produciuse un inquietante aumento do número de crianzas asasinadas polo Exército israelí e a policía de fronteira. En 2022 perderon a vida 45 menores palestinos en Gaza, Cisxordania e Xerusalén Leste. O ano 2023 está a ser o máis sanguinario desde que hai datos, con máis de 45 nenos e nenas asasinados. A última vítima mortal da ocupación israelí foi o adolescente Mohammed Rumaneh, asasinado con munición real na noite da sexta feira 29 de setembro na cidade de Al Bireh. En total, este ano, máis de 200 palestinos e palestinas foron asasinadas.