O Consello de Frisia aprobou unha moción de censura contra a Comisión Europea, nun xesto simbólico pola decisión desta de non atender a petición exposta no Minority Safepack.
Esta iniciativa cidadá europea, con 1,1 millóns de sinaturas, solicitaba á UE medidas para defender, protexer e promover os dereitos das minorías nacionais e lingüísticas.
A Comisión, desbotouna alegando que con desenvolver a lexislación existente abondaba.
Non pensan o mesmo os promotores da iniciativa lexislativa. En Frisia Occidental ─actualmente provincia baixo soberanía dos Países Baixos─, o Partido Nacional Frisón (FNP, en frisón) presentou esta moción, aprobada por unanimidade.
O FNP conta con catro membros neste parlamento de 43.
50 millóns de persoas
A moción será agora enviada a autoridades nacionais e estatais de toda a UE para que "outros países e rexións ergan a voz contra a Comisión", explicou nun comunicado.
"A UE non existe por si mesma, senón pola súa cidadanía. Entres esta hai 50 millóns de persoas en rexións onde unha lingua minoritaria é falada, e iso inclúe 650.000 frisóns", afirmou Sijbe Knol, presidente do FNP.
