domingo 05.04.2020
A suspensión da autonomía

Junqueras acusa Madrid de aplicar o artigo 155 mediante a intervención das finanzas do Govern

A decisión de Madrid de intervir as contas da Generalitat podería deixar o Govern sen capacidade de facer pagamentos, denuncia o vicepresidente do executivo catalán, Oriol Junqueras. O Estado xustifica este movimento co argumento de que, fechada a billa financeira, o Govern non tería recursos para organizar o referendo. Junqueras ve na intervención do Ministerio de Facenda unha aplicación do artigo 155 (a suspensión da autonomía) pola porta de atrás.

Oriol Junqueras, no obxectivo dunha cámara durante unha conferencia de imprensa
Oriol Junqueras, no obxectivo dunha cámara durante unha conferencia de imprensa

A Generalitat a día de hoxe ten aínda capacidade para pagar as nóminas "aos Mossos e ao profesorado o mes que vén", resumiu a situación esta segunda feira Oriol Junqueras, mais non ten garantías máis alá dese prazo porque "non sabemos que farán eles", dixo en alusión aos políticos españois.

O vicepresident, que se pronunciou nestes termos durante unha entrevista na RAC1, puxo en destaque que o obxectivo de Montoro é "controlalo todo", o que implica "o bloqueo de todas as partidas". Destarte, Madrid estaría a utilizar a lei orzamental para a efeitos prácticos "intentar aplicar o famoso artigo 155" visando "bloquealo todo e que non podamos facer ningún pagamento".

Recurso ao Supremo


O Govern xa ten decidido recorrer a decisión de Facenda perante o Tribunal Supremo, con petición expresa de que suspenda de forma cautelar a intervención das finanzas catalás por parte do goberno español.

Sexta feira pasada, o Goberno español acordou asumir o control das partidas orzamentais da Generalitat en materias tan fulcrais como a sanidade, a educación, os servizos sociais e o pagamento das nóminas do funcionariado ao se negar o Govern a enviar un informe semanal a Facenda sobre os seus gastos.

Madrid quería ter ese informe para saber se o Govern está a destinar fondos á realización do referendo.  O Goberno estatal publicou o acordo de intervención das finanzas catalás no BOE do sábado e abriu un prazo de 48 horas para o materializar. Só o suspendería no caso de que finalmente o Executivo presidido por Puigdemont dese o brazo a torcer e adoptase un acordo de non disponibilidade orzamental para gastos non esenciais (ou sexa aqueles precisos para a organización e realización da consulta).

comentarios