O primeiro ministro da India, Narendra Modi, anunciou este sábado, 9 de setembro, que os líderes dos Estados integrantes do G-20 chegaron a un consenso para emitir unha declaración común.
O comunicado final afirma que “todos os Estados deben actuar de maneira coherente cos principios e obxectivos da carta da ONU na súa totalidade. Na liña coa carta da ONU, todos os Estados deben absterse da ameaza ou o uso da forza para buscar conquistas territoriais contra a integridade territorial e a soberanía ou a independencia política de calquera Estado. O uso ou ameaza de uso de armas nucleares é inadmisíbel”.
Os líderes reunidos en Nueva Delhi tamén reivindicaron a total posta en marcha e cumprimento do acordo do acordo de exportación de gran desde portos ucraínos, ao tempo que indicaron que a reactivación do pacto pasa por garantir tamén o subministro de fertilizantes rusos.
“Apreciamos os esforzos de Turquía e os acordos asinados en Istambul coa mediación das Nacións Unidas [...] e pedimos a súa implementación plena, oportuna e eficaz para garantir o subministro inmediato e ininterrompido de cereais, alimentos e fertilizantes procedentes de Rusia e Ucraína”, sinala o texto.
Así, o grupo indicou que se trata de algo “necesario” para poder cumprir a demanda dos países en desenvolvemento, especialmente os que se atopan en África e destacou a importancia da “seguridade alimentaria e enerxética”.
Os Estados membro, que non evitaron referirse á guerra da Ucraína como “invasión”, pediron ás partes “adherirse aos principios do Dereito Internacional, incluída a integridade territorial, a soberanía e os sistemas multilaterais para salvagardar a paz e a estabilidade”.
“A resolución pacífica dos conflitos e os esforzos para abordar a crise, así como a diplomacia e o diálogo, son fundamentais”, recalcaron antes de manifestar que o seu obxectivo é “tratar o impacto adverso da guerra na economía global e dar a benvida a todas as iniciativas relevantes e construtivas que apoien unha paz integral, xusta e duradeira en Ucraína que respecte os propósitos e principios da Carta das Nacións Unidas”.
