martes 07.04.2020

Falece un traballador nunha planta de tratamento de residuos en Euskadi

É o terceiro operario que morre nunha empresa de xestión de residuos en Euskal Herria no que levamos de ano.  
Labores de extinción de incendios no cemiterio de Zaldibar (Imaxe: Irekia)
Labores de extinción de incendios no cemiterio de Zaldibar (Imaxe: Irekia)

Un traballador faleceu onte nunha planta de tratamento de residuos en Murga, Euskadi, mentres a sociedade vasca continúa consternada pola traxedia acontecida o pasado 6 de febreiro na localidade de Zaldibar, debido ao desprendemento dun vertedeiro que sepultou dous operarios, desatou incendios incontrolados durante días e contaminou o ar. 

O traballador caeu, segundo recollen medios vascos, desde unha altura de catro metros. Pese a ser evacuado de urxencia a un hospital próximo, o operario non sobreviviu ás feridas. A Ertzaintza indicou que o operario tiña 30 anos e chegou a Euskal Herria desde o Senegal.

É o terceiro falecido no territorio vasco nunha planta de residuos no que levamos de ano, e desde o sindicalismo exixiron xa que se investiguen as razóns do accidente, incluídas "as condición de traballo e os ritmos". Así o pediu a central sindical abertzale LAB, ao tempo que denunciou que as condicións laborais son cada vez "máis precarias, xa que a patronal prioriza os seus beneficios económicos sobre a saúde e vida das e dos traballadores".

Engadiu este sindicato que "mentres se fala do descenso do desemprego, seguen matando a traballadoras e traballadores utilizando a precariedade. Os accidentes de traballo non son froito da casualidade. Teñen responsábeis e sendo isto así, pedimos ao Goberno vasco que poña en marcha políticas reais que eviten os accidentes laborais", demandaron desde LAB.

Nós Diario publicou o pasado sábado, 22 de febreiro, unha entrevista a un camioneiro do vertedoiro de Zaldibar que denunciaba o descontrol das medidas de seguranza da empresa que xestiona o vertedeiro. A oposición demandou, e o Goberno vasco xa recoñeceu, que a privatización destes servizos entraña perigos. 

comentarios