A escola será presencial na Galiza (e no resto de territorios do Estado español) á volta do Nadal malia o coronavirus. Así vén de confirmalo a responsábel do Ministerio de Sanidade, Carolina Darias, após a reunión semanal do Concello Interterritorial do Sistema Nacional de Saúde.
A titular da carteira afirmou ante os medios que se vai garantir a “presencialidade nos centros educativos” malia a situación actual da pandemia, cunha sexta onda en plena expansión.
"O modelo educativo de presencialidade nas aulas é un éxito e é o modelo do Goberno de España, porque as aulas son espazos seguros", destacou Darias, convencida de que os contaxios non impedirán esa “volta ao cole” o próximo 10 de xaneiro.
En todo caso, a representante do Executivo español quixo deixar unha porta aberta a calquera cambio se a incidencia da Covid-19 crece moito máis.
Así, quedou fixado na axenda oficial un novo encontro de traballo, neste caso dos representantes dos diferentes territorios e dos responsábeis dos ministerios de Educación e Sanidade. Será o 4 de xaneiro.
A intención é continuar partillando “os avances e protocolos estabelecidos” para que as clases se manteñan como lugares seguros, tal e como sinalou Darias.
Capacidade nos eventos deportivos
Por outra parte, a representante da equipa de Pedro Sánchez falou de novas limitacións de público nas probas deportivas.
Unha vez rematado o encontro, explicou que se chegou ao acordo de que a capacidade máxima nos estadios de fútbol de primeira e segunda división pase ao 75% do 100% actual.
As instalacións fechadas (como no caso do baloncesto) poderán acoller ao 50% das persoas afeccionadas.
Máscara e comida
Aliás, aquelas afeccionadas que si accedan aos recintos deberán ter en todo momento as máscaras e seguirá prohibido fumar, comer ou beber para reducir o risco de contaxios.