Case 6.000 persoas foron evacuadas polas inundacións na rexión de Khersón

Autoridades rusas e ucraínas informaron a cuarta feira de que máis de 5.500 persoas foron evacuadas das ribeiras do río Dniéper após a inundación que comezou a terza feira pola destrución do encoro de Nova Kakhovka, arredor da que Kíiv e Moscova se culpan mutuamente, e que afecta de forma directa máis de 40.000 persoas. O presidente de Ucraína, Volodimir Zelenski, trasladou que “centos de milleiros de persoas quedaron sen acceso normal á auga potábel”, e afirmou que están a traballar para garantir o acceso á subministración ás localidades que dependían do encoro. Oleksandr Prokudin, gobernador da rexión de Khersón nomeado por Kíiv, cifrou en 1.700 as persoas evacuadas e en 1.582 as vivendas que resultaron inundadas na marxe oeste do Dniéper, que está controlada polas Forzas Armadas ucraínas. Na marxe leste, dominada polos militares rusos, a vicegobernadora do oblast de Khersón nomeada por Moscova, Tatyana Kuzmich, comunicou que máis de 4.000 persoas foron evacuadas. Aliás, Vladimir Leontiev, alcalde de Nova Kakhovka, localidade situada na ribeira leste, subliñou que sete persoas están consideradas desaparecidas tras superarse máis de 10 metros os niveis de auga normais do río, antes de comezar a baixar, así como que se puxo en marcha un operativo de rescate para axudar cando menos un centenar de persoas atrapadas pola auga. Leontiev tamén sinalou que cada segundo cruzan os restos do encoro controlado por Rusia máis de 30 millóns de litros de auga, e confirmou que milleiros de animais morreron no parque natural de Nizhnedniprovsky, despois de divulgarse a morte dos animais no zoo da vila, nun desastre dunha escala “enorme”. Pola súa parte, a Organización das Nacións Unidas (ONU) asegurou que, no mínimo, 16.000 persoas perderon os seus fogares. Tras estimar os servizos meteorolóxicos ucraínos que a cuarta feira ficou estabilizado o nivel de auga no Dniéper, cinco metros por riba do normal, os servizos de emerxencia de Rusia emitiron un cálculo que sostén que os niveis continuarán altos segundo a zona de dous a nove días máis. A pesar de que até o retroceso das augas do Dniéper non se poderán avaliar os danos definitivos, os mercados de futuros do trigo na bolsa de Chicago eleváronse 3% ao facerse pública a destrución da presa, o que, segundo Moscova, tería arrasado os campos de cultivo da ribeira oriental, situada a unha altura menor con respecto ao nivel do mar que a beira occidental. Aínda así, transcendeu que 100.000 hectáreas de cultivo baixo o control de Kíiv foron inundadas. Arredor desa cuestión, o Ministerio de Agricultura ucraíno advertiu de que a falta de irrigación para os cultivos do sur do país, que dependían do encoro, pode converter “en desertos o próximo ano” medio millón de hectáreas, logo de comunicar que a ruptura da infraestrutura cortou a subministración de 31 sistemas de rego nas rexións de Dnipropetrovsk, Khersón e Zaporijia. Tamén se prevén dificultades na península de Crimea, cuxa subministración de auga dependía en boa medida da canle conectada á presa de Nova Kakhovka, bloqueada por Kíiv tras a adhesión da rexión a Rusia en 2014 e reactivada o pasado ano na invasión rusa. As autoridades locais non descartaron cortes no servizo, o que danaría os cultivos do norte da península. O viceprimeiro ministro de Kíiv, Oleksandr Kubrakov, alertou nunha visita á zona afectada que “a auga está a perturbar as minas que se colocaron, causando que estoupen”, e mais dos perigos da propagación de enfermidades e de químicos perigosos na auga. Unha advertencia semellante lanzou Vladimir Saldo, gobernador de Moscova en Khersón, que aseverou que a pesar de que Kíiv buscaba “unha vantaxe estratéxica” ao destruír o encoro, “desde o punto de vista militar, a situación operativa e táctica está a favor das forzas rusas”. Autoría En todo caso, aínda mantendo as acusacións cruzadas, nin Rusia nin Ucraína ofreceron probas da culpabilidade do outro nunha situación que para ambas as partes provoca prexuízos e xera oportunidades militares ao mesmo tempo. Desde Kíiv, reiteran que Rusia fixo explotar a sala de máquinas da central hidroeléctrica do encoro co obxectivo de frear os supostos avances na guerra dos seus militares. En paralelo, Moscova apunta a un ataque ucraíno para agochar o fracaso do comezo da anunciada contraofensiva militar e indicou que o encoro foi atacado desde o pasado verán. O maior xeneral ucraíno Andriy Kovalchu admitiu en decembro ter utilizado armamento da Organización do Tratado do Atlántico Norte contra a instalación. Asemade, fontes das dúas partes inculpáronse polos altos niveis de auga no encoro de Nova Kakhovka antes da explosión, que para as ucraínas amosa como Rusia preparou o incidente e para as rusas como Ucraína fixo o mesmo ao acumular auga nos cinco encoros río arriba no Dniéper controlados por Kíiv. Neste sentido, Washington defendeu que non ten información concluínte sobre o acontecido. Rusia denuncia danos nunha canle de amoníaco Unha explosión a segunda feira na localidade de Masiutivka, na rexión de Khárkiv (nordeste de Ucraína), danou o conduto de amoníaco que decorre desde Togliatti (Rusia) a Odesa (Ucraína), provocando vítimas civís e unha vertedura de amoníaco, ratificou a cuarta feira o Ministerio de Defensa ruso, que responsabilizou “un grupo subversivo ucraíno”. Autoridades rusas fixaron que a reparación durará entre un e tres meses. As exportacións de amoníaco desde Odesa por este ducto -que segundo Moscova alcanzan para producir fertilizantes para xerar cada ano alimentos para 45 millóns de persoas- están incluídas nos acordos para a exportación de alimentos polo mar Negro. Porén, levan bloqueadas desde o comezo da invasión rusa. Contraofensiva militar Aínda que as accións ofensivas lanzadas o domingo por Kíiv -con reportes do uso de tanques occidentais- foron consideradas o inicio da contraofensiva, as autoridades ucraínas negárono. Así e todo, medios especializados confirman combates na liña da fronte, entrementres, Ucraína apenas reclamou avances nos flancos de Bakhmut, en Donetsk, de entre 200 e 1.100 metros. Ademais, as partes denunciaron bombardeos do outro durante as evacuacións polas inundacións na rexión de Khersón.