sábado 23/01/21

O Congreso de EUA certifica a vitoria de Joe Biden, horas despois do asalto 'trumpista' ao Capitolio

A sesión retomouse ás 2 da madrugada (hora galega) despois de case 4 horas de caos no Capitolio. A alcaldesa de Washington DC, Muriel Bowser, informou de catro persoas mortas. Congresistas e analistas piden a "inhabilitación" de Trump por alentar un "golpe de estado".

Multitude diante do Capitolio durante o asalto (Foto: NBC)
Multitude diante do Capitolio durante o asalto (Foto: NBC)

Os catro anos de Goberno de Domald Trump teñen como broche unhas imaxes que nin sequera as distopías made in Hollywood foron quen de imaxinar nun filme: o asalto ao Capitolio de EUA por centos de manifestantes, que percorreron estancias e despachos de congresistas, facéndose selfies e proclamando que o resultado das eleccións estadunidense eran unha fraude.

O trumpismo en estado puro. Horas antes do asalto, e ante miles de simpatizantes, Trump volveu poñer en dúbida o resultado electoral e chamou a “recuperar o noso país”. Meu dito, meu feito: unha multitude de trumpistas dirixiuse ao Capitolio e, ante unha falla de seguridade que contrasta coa presenza de policías e Garda Nacional cando mobilizacións pacíficas se desenvolven fronte a ese edificio, moitos deles accederon ao edificio. Unhas imaxes que axiña deron a volta ao mundo.

 A alcaldesa de Washington DC, Muriel Bowser, informou de que catro persoas morreron como consecuencia dese asalto: unha muller por un disparo durante o asalto e outras tres persoas nas proximidades do edificio por “emerxencias médicas”.

O vicepresidente  Mike  Pence, que presidía a sesión conxunta das dúas cámaras, tivo que ser evacuado e protexido. A súa negativa para cumprir a orde de Trump para que cambiase o resultado electoral converteulle nun dos inimigos dos extremistas. Ao rexeitar os seus consignas, o presidente respondeulle cun tweet: “Mike Pence non ten a coraxe de facer o que debería facer para protexer ao noso país e a Constitución”.

Joe Biden denunciou os actos. "Non é unha protesta, é unha insurrección", apuntou. Rematou o seu discurso co recoñecíbel: "Deus bendiga América". Xusto despois falou Trump, a través das redes, pediu aos seus seguidores que regresara ao seu fogar, agradeceu o seu apoio e, tamén, seguiu sen recoñecer os resultados electorais. Twitter, nunha decisión sen precedentes, suspendeu a conta de Trump.

No medio do caos, as autoridades decretaron o toque de recoller na cidade.

Após catro horas de caos no Capitolio, e unha vez que os asaltantes 'trumpistas' abandonaron o edificio, retomouse a sesión para certificar a vitoria de Joe Biden. Todo aínda baixo a conmoción do vivido e con non poucas voces falando de que o vivido foi un intento de "golpe de estado".

Reaccións desde a Galiza

Na Galiza tamén houbo reaccións ao 'asalto'. A través das súas contas nas RRSS, a portavoz do BNG, Ana Pontón, e o secretario xeral do PSdeG, Gonzalo Caballero, amosaron a súa preocupación polo que estaba a acontecer.

"Moita preocupación polo que está pasando en EEUU. A crispación que impulsa a extremadereita é un perigo para a democracia, os dereitos e as liberdades. Non o esquezamos nunca", escribia a nacionalista.

"Moi preocupante. 74 millóns votaron Trump. Hoxe vemos un  gravísimo asalto ao Congreso máis que un golpe de estado. Evidénciase a tensión e crispación entre 2 américas. Manterá  Trump a crispación fronte ao presidente  Biden? Empezou  Trump a súa campaña presidencial para 2024?", poñía no seu twitter o líder socialista.

comentarios