Así avanza a fenda ideolóxica entre homes e mulleres

Elas, cada vez máis de esquerdas, eles, cada vez máis de dereitas, e no fondo, un debate acerca da igualdade, o camiño andado e o que nos queda por avanzar. A fenda ideolóxica tanto por cuestión de xénero, como por idade, foi unha preocupación clásica por parte da Ciencia Política. Numerosos estudos se preguntaron polas diferenzas na identificación ideolóxica na tradicional escala esquerda-dereita, así como polas diversas manifestacións en clave de identificación partidista entre homes e mulleres. Se tradicionalmente se considerou que as mulleres eran máis conservadoras, cando menos ata o declive da relixiosidade e o auxe da segunda onda feminista dos anos sesenta, as diferenzas non eran estatisticamente demasiado relevantes, senón que era a idade o que parecía explicar mellor as diferenzas, sendo as cohortes maiores as máis conservadoras. Hoxe, porén, nos países das democracias liberais occidentais asistimos a un cambio de tendencia. Xeración Z A fenda ideolóxica entre homes e mulleres da mesma xeración é a máis alta dende que se teñen rexistros, sobre todo na xeración Z (a das persoas nacidas entre mediados dos noventa e primeiros 2000). Así o certifica o CIS no seu último barómetro e así o sinalan tamén a Enquisa Social Europea, a Enquisa Social Americana e a Enquisa Social de Corea. Os candidatos da extrema dereita teñen especial éxito entre os homes máis novos: Trump, Millei ou Abascal. Así, por exemplo, os homes que votaron a Vox que teñen entre 18 e 34 anos duplicaron a media de votos que recibiu o partido sobre o total da poboación. Do mesmo xeito, os homes de 18 a 24 anos que se consideraban de extrema dereita pasaron de 1,15% no 2013 a 5,85% no 2023. Pola contra, as mulleres de 18 a 24 anos son as que se sitúan máis á esquerda, e fano máis que nunca, colocándose nun 4,2 (nunha escala 1 esquerda, 10 dereita). É dicir, que non son os homes de mediana idade, amigos de Pedro Sánchez, os máis desorientados, son os rapaces máis novos, os que máis conectan con posturas políticas antifeministas que teñen especial éxito en internet. Manosfera A chamada manosfera [rede de espazos virtuais que acollen diversos movementos e promoven discursos misóxinos en prol dunha masculinidade reforzada] alimenta posturas políticas que fan do antifeminismo unha das súas bandeiras e que explica, en gran medida, ese 51,8% de homes que ten entre 16 e 24 anos e considera que se chegou tan lonxe na promoción da igualdade das mulleres que agora se está discriminando os homes; porcentaxe que supera en algo máis de 10 puntos os homes que teñen esa impresión de 65 anos ou máis. As opinións sobre a igualdade dividen a homes e mulleres, pero fano especialmente se atendemos á súa autolocalización ideolóxica. A porcentaxe de homes que sinalan ter ido demasiado lonxe aumenta ata 78% dos homes con posicións máis a dereita, mentres que nos situados máis á esquerda, esa porcentaxe queda nun 15,4%. Non se trata, unicamente, de que homes brancos heterosexuais de curta idade sintan perigar os seus privilexios, senón que están descontentos e desconcertados. Nin teñen un discurso claro do que se espera deles en temos sociais, nin as promesas de éxito económico individual propias do neoliberalismo se cumpriron, deixando ante si un horizonte de precariedade e incertezas no que hai quen percibe unha maior competencia por recursos escasos e no que os discursos que buscan culpables externos dese malestar, neste caso, as mulleres, como noutros casos, as persoas migrantes, teñen éxito. Igualdade de xénero Todos estes factores son alimento do que algunhas investigacións chaman sexismo moderno e que aumenta en contextos económicos precarios, aos que as opcións políticas de extrema dereita responden en chave identitaria e reivindicando masculinidades tradicionais. Ser "moi macho" convértese nunha reivindicación política e, ao tempo, nunha calidade para gobernar. Mesmo as eleccións dos USA en novembro poñen sobre a mesa certo referendo ou concurso sobre a masculinidade. Ser "moi macho" convértese nunha reivindicación política e, ao tempo, nunha calidade para gobernar Non todo é negativo, no lado máis esperanzador da balanza, o estudo publicado en novembro polo CIS arredor das percepcións da cidadanía sobre a igualdade, amosa que malia a aceptación de certos slogans antifeministas, os valores da igualdade de xénero avanzan e xeran consensos sociais amplos.