Milei insiste e Vigo perdería 50.000 toneladas de peixe anuais coa 'lei Ómnibus' arxentina

Afrota pesqueira galega volve á incerteza sobre a súa continuidade nos caladoiros internacionais. O sector non deixou de sufrir importantes transformacións, en especial desde a implantación en 1977 de Zonas Económicas Exclusivas de 200 millas. Nos últimos anos a maior dificultade decorría en augas da Unión Europea (UE), cos vetos que chegaron en 2022 a afectar 87 caladoiros onde faenaban palangreiros e embarcacións de arrastre da Galiza. Agora, coa mudanza no Goberno arxentino e a chegada o pasado 10 de decembro de 2023 do ultraliberal Javier Milei á Casa Rosada, o novo Executivo dese país suramericano aumentou as taxas e propón modificacións á Lei Federal de Pesca coa denominada 'lei Omnibús' que abre, mediante poxas, eses espazos actuais de pesca. O presidente da Cooperativa de Armadores de Vigo (ARVI), Javier Touza, recoñece en declaracións a Nós Diario que é un momento “complicado” após máis de trinta anos de fortes investimentos nesa zona a través de sociedades mixtas, cun socio local e empregando persoal arxentino como marcou até agora a lexislación dese país. Os cambios propostos afectarían uns 80 barcos, ademais de todas as instalacións situadas en terra e os frigoríficos cos que contan. “É unha zona moi deprimida economicamente, con falta de emprego, e nós creamos milleiros de postos de traballo”, explica Javier Touza, “tamén é unha gran fonte de divisas, tendo en conta que o consumo de peixe na Arxentina é moi escaso e importámolo todo cara a Europa a través da Galiza”, engade. Desde ARVI teñen contabilizadas até agora un total de 50.000 toneladas anuais procedentes destes caladoiros que entran todos os anos por Vigo para logo ser distribuídas por toda a UE. A maior parte deste comercio está vinculado directamente a grupos de capital vigués como Nova Pescanova, Iberconsa, Profand ou Wofco. A repartición das cotas de pesca na UE deixa alegrías e decepcións entre os sectores da frota Apoios ao sector galego desde Arxentina Touza afirma que mantiveron conversas e contan co apoio da Asociación de capitáns e tripulantes da Arxentina (máis de 75% da mariñeiría e todos os capitáns teñen son desa nacionalidade) ademais das autoridades das provincias dese país nas que traballan. A resposta foi inmediata e, malia as diferenzas ideolóxicas entre eles por ser de partidos políticos distintos, os responsábeis das circunscricións de Terra do Fogo, Santa Cruz, Chubut, Neuquén e Río Negro (na Patagonia) emitiron un comunicado apoiando a continuidade da frota galega e anunciando o voto en contra no Congreso arxentino. Tras as críticas, o portavoz presidencial arxentino, Manuel Adorni, aseguraba o pasado 4 de decembro que o Executivo estaba “aberto ao diálogo e a discutir os puntos que poidan xerar controversia” da 'lei Ómnibus'. Ademais, asegurou que os gobernadores patagónicos “serán parte do diálogo e a discusión”. Porén, un día despois, Milei desautorizou o ministro asegurando que “non cambiará unha coma”, descartando así dar marcha atrás na lei prevista. Abanca rompe as negociacións para a venda de Nova Pescanova á canadense Cooke Aumento de aranceis Se a 'lei Ómnibus' está aínda en negociación, o que está en marcha é unha nova taxa de 15% do valor das exportacións. Até agora, a frota, para poder exportar, tiña que pagar uns aranceis de entre 1% e 6% en función da xeración de valor engadido en terra a partir da contratación de man de obra arxentina. “Agora é lineal e todos pagamos ese 15%, polo que perdemos moita competitividade ao non ter en conta todos os investimentos que realizamos”, afirma o responsábel de ARVI. Con esta situación, Touza considera que o produto será “máis caro en Europa”. Sen intervención dos Gobernos galego e español Polo de agora non transcendeu de maneira pública ningún tipo de intervención por parte das autoridades galegas e estatais en relación a este tema. As armadoras galegas consideran, neste sentido, “de suma importancia” estes caladoiros para a frota do país e o propio Touza lembra que cando entraron a traballar neles foi “a través de acordos internacionais que facilitaron a creación de sociedades mixtas”. Por este motivo entende que “as autoridades saben e son conscientes do impacto económico, como líderes no Estado español, que ten manter estes caladoiros e toda a infraestrutura que teñen instalada na Arxentina”. Neste sentido, o responsábel de ARVI confirma a Nós Diario que vén de mantes conversas con representantes da Consellaría do Mar, o Ministerio de Asuntos Exteriores e o Ministerio de Agricultura, Pesca e Alimentación. “Agardo que prime a lóxica, estamos moi involucrados e as empresas arxentinas coas que traballamos son arxentinas”, incide Touza, “ademais, pagamos tributos alí e xeramos riqueza”, conclúe. Por este motivo, desde ARVI chaman á tranquilidade, considerando que "hai marxe para que ao final respecten os dereitos adquiridos". Ademais, están abertos "á colaboración científica" das embarcacións que faenan en augas arxentinas. Conxemar reivindica a existencia dun Ministerio exclusivo de Pesca A Consellaría do Mar asegura a Nós Diario que están “en permanente interlocución co sector” nunha situación “que preocupa polas posíbeis consecuencias da inseguridade xurídica e os seus efectos nos investimentos levadas a cabo polas empresas galegas”. Rematan afirmando que poderían “actuar con responsabilidade e discreción, como así o solicitan os axentes afectados”. Múltiples críticas O apoio de destacados membros e responsábeis do PP ao actual presidente da Arxentina, comezando por Mariano Raxoi que asinou un manifesto ao seu favor ou o seu actual líder, Alberto Núñez Feixoo, que asegurou que co ultraliberal Milei acabouse o "peronismo corrupto", a situación é incómoda para o Goberno galego. Preguntado por Nós Diario, o deputado membro da comisión nacional de pesca do PP, José Manuel Balseiro, evitaba falar de interceder ante Milei e remitíase ao conselleiro de Pesca e ao “diálogo entre os dous países”. Neste caso, desde o BNG, a eurodeputada Ana Miranda criticaba que o PP estivera “calado” e lembraba “a alegría coa que o PP apoiou Milei no proceso electoral arxentino sen ter en conta as repercusións das súas propostas para a economía galega. Este apoio reflicte perfectamente o que lle importa Galiza ao Partido Popular, ou sexa nada”. Ademais, lembra que existe un acordo de cooperación comercial e económica entre a UE e a Arxentina, que desde 1990 marca os específicos de cooperación en materia de pesca, usos da enerxía nuclear e a cooperación científica e tecnolóxica. "En que punto queda este acordo de cooperación á vista das intencións do presidente arxentino?”, pregúntase. Ana Miranda urxe un xiro nas políticas da UE que "prexudican" a pesca artesanal Por último, o deputado no Congreso e aspirante do PSdeG á Presidencia da Xunta, Xosé Ramón Gómez Besteiro, insistía tamén en que “Milei, era o candidato preferido polo que apostaban tanto Feixoo como Rueda e o mesmo Abascal” polo que se pregunta “a que esperan para defender os intereses españois?”.