O tipo de xuro medio ao que as entidades bancarias con presenza na Galiza concederon créditos hipotecarios no mes de maio alcanzou a taxa de 3,967%, o que supón o seu nivel máis elevado desde febreiro de 2009, cando se situou en 4,324%, segundo os datos recollidos esta cuarta feira polo Banco de España.
Desta forma, o tipo de xuro medio dos préstamos hipotecarios a máis de tres anos para a adquisición de vivenda libre concedidos polas entidades subiu por décimo quinto mes consecutivo, elevándose 2,8 décimas porcentuais respecto da taxa de 3,683% observada en abril. En maio de 2022, o tipo de xuro medio ao que se asinaban as hipotecas era de 1,54%.
Pola súa parte, o tipo de xuro medio dos préstamos hipotecarios de entre un e cinco anos para a adquisición de vivenda libre concedidos polas entidades de crédito na zona do euro foi de 3,81% en maio, fronte á taxa de 3,77% rexistrada no mes de abril e á de 1,72% experimentada no mesmo mes de 2022.
Ademais, o Euribor a doce meses, o índice de referencia para a maioría das hipotecas na Galiza, fechou o mes de maio en 3,862%, fronte á taxa de 3,757% en abril e á de 0,287% de maio de 2022. Así mesmo, a media de Euribor no que vai de mes de xuño xa alcanza 3,95%, chegando a superar a cota de 4% durante os últimos catro días.
Neste contexto, a Asociación Hipotecaria Española (AHE) alertou esta cuarta feira de que o ciclo monetario actual, con subas de tipos de xuro e endurecemento das condicións de crédito, expulsou aos compradores de vivenda de menos ingresos.
"O escenario inflacionista que vén marcando o último ano e medio desprazou do mercado aos compradores de rendas menores, cunha presenza xa de seu máis marxinal, a favor dos consumidores con maior poder adquisitivo que precisan de niveis de financiamento inferiores e aos que por tanto, aínda que non son alleos á suba dos tipos de xuro, o encarecemento dos custos financeiros aféctalles en menor medida", indicou AHE ao respecto do acceso á vivenda.
A Reserva Federal dos EUA rexeita un maior control do sector da banca
O presidente da Reserva Federal dos Estados Unidos de América (Fed), Jerome Powell, argumentou esta cuarta feira ante a Comisión de Servizos Financeiros da Cámara de Representantes dos Estados Unidos de América (EUA) que non é pertinente unha regulación financeira excesiva, xa que, debido á variedade de tamaño das entidades bancarias dos EUA, os bancos máis pequenos poderían ver comprometidos os seus modelos de negocio.
