O sector enerxético pide máis tempo para cumprir os requirimentos ambientais para a construción de proxectos de enerxía renovábel

O Goberno do Estado español está "valorando" ampliar os prazos para o desenvolvemento de proxectos de enerxía renovábel, que marcan o próximo 25 de xullo como data límite para conseguir as autorizacións de licenzas de construción. Á súa chegada á xornada España na Europa do século XXI organizada pola consultora Hill Knowlton, a vicepresidenta terceira do Goberno español e ministra para a Transición Ecolóxica e o Reto Demográfico, Teresa Ribera, recoñeceu que se "está valorando se en efecto é necesario ampliar os prazos". "A costa galega non é un polígono industrial": Adega alerta da ameaza da eólica mariña no Día Mundial dos Océanos Esta ampliación suporía, de facto, dar unha segunda oportunidade e maiores facilidades ás multinacionais do sector eléctrico para modificar os proxectos de instalación de enerxías renovábeis que non foron aceptados (ou aceptados con condicións) por non superar os requisitos normativos e ambientais. Neste sentido, Ribera sinalou que como consecuencia de "todo o turbulento que foi o ano 2022 para todos", están a identificarse dificultades na cadea de subministración ou na necesidade de volver someter a información pública proxectos que viron como se introducían "moitas condicións" no desenvolvemento das súas Declaracións de Impacto Ambiental (DIA). Desta maneira, afirmou que o Ministerio para a Transición Ecolóxica e o Reto Demográfico (Miteco) está "escoitando" as propostas que están chegando do sector e "vendo" se en efecto ten sentido ampliar estes fitos para "dar estabilidade e tranquilidade a unha transformación moi importante do noso sistema enerxético que ha de facerse con todas as garantías ambientais e con todos os beneficios que merecen as comunidades locais". En concreto, estes novos fitos administrativos cúmprese dous días despois das eleccións estatais, convocadas para o próximo 23 de xullo. Ante esta circunstancia, as empresas do sector enerxético argumentan que será complicado cumprir os requisitos para a promoción de moitos proxectos dentro dos prazos estabelecidos, ao ser necesario aceptar as adaptacións das DIA dos proxectos e pasalas novamente a información pública para conseguir a autorización administrativa de construción. O pasado 25 de xaneiro viviuse unha situación parecida cando finalmente someteuse sobre a bucina por parte do Miteco un total de 202 expedientes de proxectos de enerxías renovábeis, a totalidade dos que debían obter a DIA, ao procedemento de Avaliación de Impacto Ambiental. Deles, un total de 154 expedientes recibiron a DIA positiva, 36 negativa e 12 arquiváronse. Desta maneira, a potencia dos proxectos avaliados ascendeu a 35.879 megawatts (MW), dos que 27.943 MW obtiveron unha avaliación da DIA favorábel. A gran maioría das autorizacións de proxectos renovábeis teñen condicionamentos Con todo, a gran maioría das DIA favorábeis dos proxectos contiñan condicións de obrigado cumprimento, sen as que non se consegue o resto das autorizacións administrativas da tramitación. Así mesmo, tres de cada catro expedientes con DIA positiva sufriron modificacións antes de obtela, con reducións de superficie de ocupación ou do volume de equipos a instalar. Iberdrola incrementa a aposta de investimento Neste contexto no que o Miteco abre a porta a ampliar os prazos para que as empresas eléctricas cumprimenten os requirimentos necesarios para o desenvolvemento de proxectos de enerxía renovábel, Iberdrola vén de subscribir co Banco Europeo de Investimentos (BEI) un acordo de financiamento por valor de 1.000 millóns de euros para acelerar os seus plans de instalación de renovábeis mediante a construción de plantas fotovoltaicas e de eólica terrestre nos Estados español, portugués e alemán. Iberdrola agochou as súas tarifas reguladas de luz e gas para evitar o acceso a prezos máis baratos Os plans de Iberdrola no eido das renovábeis, que se poderían ver beneficiados dunha potencial prórroga administrativa por parte de Executivo estatal, teñen Galiza no albo de gran parte das súas perspectivas de negocio, pois segundo anunciou a propia multinacional en 2022 teñen preparados investimentos por valor de 4.400 millóns de euros para desenvolver actuacións no territorio galego, entre as que se atoparían a eólica terrestre e mariña, o bombeo hidráulico, a enerxía solar ou a xeración de metanol e hidróxeno. Precisamente, a multinacional enerxética fixo referencia aos fitos fixados para o desenvolvemento de proxectos de enerxía renovábel na Unión Europea (UE), enmarcados no plan RepowerEU. Para o presidente de Iberdrola, Ignacio Sánchez Galán, a sinatura do investimento financiado polo BEI "supón un enorme revulsivo para acelerar a independencia enerxética da UE (en liña co Plan RePowerEU)". Pola contra, a posibilidade de que se aumenten as facilidades para adecuar os proxectos de enerxía renovábel dentro do marco do cumprimento dos fitos da UE nesta materia suporía un revés para a loita de colectivos ecoloxistas, veciñais e mesmo de sectores produtivos como o agrogandeiro e o pesqueiro, que conseguiron a paralización de diversos proxectos que, ao seu entender e segundo corroborou a Administración, non cumprían cos requirimentos necesarios para superar as preceptivas Avaliacións de Impacto Ambiental. A xeración de hidróxeno pode chegar ás costas galegas Capital Energy selou unha alianza coa empresa francesa Lhyfe para o desenvolvemento conxunto de proxectos de xeración de hidróxeno renovábel mariño asociados a parques eólicos mariños na península Ibérica. Unha aposta que pon no albo as costas galegas, onde Capital Energy xa impulsou dúas instalacións de parques de eólica mariña localizados fronte á comarca da Mariña e ás Rías Baixas, cunha potencia de 1.020 megawatts (MW). O Ministerio relega a inclusión da Galiza no corredor de hidróxeno á segunda fase Segundo o convenio asinado entre as compañías, estas construirán plantas mariñas de hidróxeno nalgunhas das localizacións nas que promoven eólicos. O director de 'Offshore' de Capital Energy, Pablo Alcón, destacou a aposta da firma polo hidróxeno e que "era o momento de dar o salto ao mar, para o que nos unimos ao mellor socio posíbel, Lhyfe, que conta con extensa experiencia na xeración de hidróxeno en zonas de ámbito mariño". A Galiza, a maior damnificada A nova aposta por ligar a produción de hidróxeno no mar a proxectos de eólica mariña deixa Galiza como o territorio potencialmente máis damnificado, posto que 47% da superficie destinada a eólica mariña recollida nos Plans de ordenación dos espazos marítimos (POEM) do Estado español atópase localizada no país.