Os fondos acredores do Grupo Celsa veñen de elixir Rafael Villaseca como presidente do consello de administración en substitución de Francesc Rubiralta, que perdeu o poder accionarial esta segunda feira por unha sentenza xudicial derivada da fase concursal á que se viu sometida a compañía. Tras a homologación por parte do xulgado do plan de reestruturación presentado polos acredores do Grupo Celsa, a empresa aposta polo ex conselleiro delegado de Gas Natural Fenosa para pilotar a nova etapa de Celsa.
Con este nomeamento, os fondos celebran a súa aposta por "unha figura recoñecida e de consenso coa Administración", e cumpren así co compromiso anunciado no seu plan de reestruturación de pór a compañía en mans de executivos independentes "de primeiro nivel e con dilatada traxectoria profesional".
Villaseca, enxeñeiro pola Universitat Politécnica de Catalunya (UPC) e MBA por IESE, foi conselleiro delegado de Gas Natural Fenosa, hoxe Naturgy, durante trece anos, entre 2005 e 2018, e é o actual presidente da Fundación Naturgy. Tamén é conselleiro de Cementos Molins e de VidaCaixa, e foi membro do Consello Asesor de Foment del Treball Nacional, a patronal catalá.
No pasado, entre outros cargos, desempeñou os de conselleiro de Enagás e Amper e de conselleiro director xeneral do Grupo Panrico. Aliás, foi nomeado conselleiro delegado do Ano nos Platts Global Energy Awards de 2010, os premios máis importantes do sector enerxético a nivel mundial.
A súa traxectoria tamén inclúe postos de responsabilidade en Nueva Montaña Quijano, como conselleiro delegado; presidente de Gestión de Infraestruturas; presidente do Grupo INISEL —hoxe INDRA—; presidente do Club Español da Enerxía, e vogal da Xunta Directiva do Círculo de Economía.
Este nomeamento, engaden os novos responsábeis de Celsa, supón "o recoñecemento por parte dos acredores do carácter estratéxico da siderúrxica e da súa importancia para a economía española", así como o seu compromiso co obxectivo de "garantir estabilidade financeira da empresa, o mantemento do emprego e das operacións no Estado español", así como a súa proxección internacional.
