Os prezos dispáranse e a inflación alcanza a cota máis alta desde 1985

A inflación subxacente escala até 3,4%, o seu nivel máis elevado desde 2008. Os prezos soben un 3%, a maior alza en 44 anos.
A suba dos carburantes, na base do incremento da inflación. (Foto: Europa Press).
photo_camera A suba dos carburantes, na base do incremento da inflación. (Foto: Europa Press).

O Índice de Prezos de Consumo (IPC) subiu un 3% en marzo en relación ao mes anterior e elevou a súa taxa interanual máis de dous puntos, até 9,8%, o seu valor máis alto en 37 anos, concretamente desde maio de 1985.

Co dato de marzo, o IPC interanual encadea a súa décimo quinta taxa positiva consecutiva, segundo os datos avanzados esta cuarta feira polo Instituto Nacional de Estatística (INE).

Segundo Estatística, o aumento do IPC interanual de marzo até 9,8% débese ás subidas "xeneralizadas" na maioría dos seus compoñentes, destacando a repunta dos prezos da electricidade, os carburantes e os alimentos e bebidas non alcohólicas, maiores en marzo deste ano que no mesmo mes de 2021.

O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que aumentou en marzo catro décimas, até 3,4%, o seu valor máis alto desde setembro de 2008. Deste xeito, a subxacente sitúase máis de seis puntos por baixo da taxa do IPC xeral.

Os prezos, disparados

En taxa mensual, o IPC rexistrou en marzo un incremento de 3% respecto a febreiro, a súa maior alza mensual en calquera mes desde 2002, cando se cambiou a metodoloxía desta estatística para recoller mellor a evolución do mercado.

Botando a vista máis atrás, tomando series anteriores, a repunta mensual de marzo é a máis elevada desde agosto de 1977.

No terceiro mes de 2022, o Índice de Prezos de Consumo Harmonizado (IPCA) situou a súa taxa interanual en 9,8%, máis de dous puntos por encima da de febreiro.

Pola súa parte, o indicador adiantado do IPCA avanzou un 3,9% en taxa mensual.

Os datos definitivos do IPC de marzo coñeceranse o próximo 13 de abril.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios