O prezo medio dos carburantes encadeou a súa sétima semana consecutiva de subidas, o que levou o litro de gasolina a superar a cota dos 1,7 euros e ao do gasóleo para pasar os 1,6 euros.
En concreto, a gasolina encareceu esta semana 1% con respecto a hai sete días, para situarse nos 1,709 euros por litro, o seu valor máximo no que vai de 2023 e o máis alto desde finais de novembro, aínda que entón estaba vixente a subvención de 20 céntimos por litro implantada polo Goberno español.
Así, habería que remontarse até principios de agosto do ano pasado para atopar un nivel máis alto para o prezo do litro deste combustíbel tendo en conta a bonificación do Executivo que estivo vixente até finais de 2022.
Pola súa parte, o prezo medio do diésel tamén encadea sete semanas consecutivas de subidas, cun encarecemento de 0,94% na última semana, para alcanzar os 1,601 euros o litro, un nivel que non marcaba desde a penúltima semana do pasado mes de febreiro, segundo datos do Boletín Petroleiro da Unión Europea.
Desde inicios de xullo, cando se iniciou esta nova espiral alcista nos prezos dos carburantes, o litro de gasolina acumula un incremento no seu prezo de 7,34%, mentres que o de gasóleo suma un encarecemento de 11,3%.
Con estes novos repuntes, o prezo de ambos os carburantes consolídase amplamente por encima dos niveis aos que ascendían antes do estalido da guerra de Ucraína que comezou o 24 de febreiro de 2022 e que, no caso do diésel, era de 1,479 euros por litro, e, para a gasolina, de 1,594 euros por litro.
Con todo, ambos os carburantes mantéñense aínda lonxe dos máximos que tocaron hai máis dun ano, cando en xullo a gasolina alcanzou os 2,141 euros e o gasóleo os 2,1 euros.
Encher o depósito
Cos prezos actuais, encher un depósito medio de 55 litros de gasolina ascende actualmente a uns 94 euros, fronte aos 87,3 euros -uns 6,7 euros máis- que custaba a estas alturas do pasado ano, incluíndo o desconto de 20 céntimos por litro que estaba vixente hai un ano.
No caso do gasóleo, encher un depósito medio de 55 litros supón actualmente uns 88 euros, perto de 30 céntimos menos que os 88,3 euros que custaba no mesmo período de 2022.
O ano pasado, pola escalada no prezo dos carburantes pola crise enerxética provocada polo conflito bélico, estaba vixente a bonificación mínima de 20 céntimos por litro de combustíbel.
Igualmente, con esta, o diésel suma 27 semanas seguidas por baixo do prezo da gasolina. Mantense así na situación habitual de antes da invasión rusa de Ucraína, que provocou que o prezo do diésel fose máis caro que o da gasolina de forma continuada desde agosto de 2022 e até mediados de febreiro deste ano, cando rompeu esa dinámica.
Neste contexto, esta quinta feirao barril de Brent, de referencia en Europa, cotizaba a 83 dólares, mentres que o Texas americano intercámbiase a uns 78,8 dólares.
O prezo dos carburantes depende de múltiples factores, como a súa cotización específica (independente da do petróleo), a evolución do cru, os impostos, o custo da materia prima e da loxística e as marxes brutas. Ademais, a evolución na cotización do cru non se traslada directamente aos prezos dos carburantes.
