O paro rexistrado nas oficinas galegas dos servizos públicos de emprego subiu en 2.705 persoas en outubro, en relación co mes anterior (+2,07%), segundo datos publicados esta sexta feira polo Ministerio de Traballo e Economía Social.
Este incremento é superior ao da media estatal, xa que no total do Estado o paro creceu en outubro 1,3%, con 36.936 desempregados máis, lastrado, sobre todo, polo sector servizos, que concentrou boa parte do incremento do desemprego polo fin da tempada turística.
Así, na Galiza contabilízanse 133.348 parados, 10.372 menos que hai un ano (-7,22%), mentres que a nivel estatal rexístranse 2,75 millóns de desempregados, 5,33% menos que en outubro de 2022 (-155.488 parados menos).
No último ano, todo o territorio galego rexistrou un descenso do número de parados. Entre outros datos, 58,7% das paradas galegas son mulleres, mentres que 4,35% ten menos de 25 anos.
Por sectores
Por sectores, 71,2% dos desempregados no país pertence ao sector servizos, onde se incrementou o paro en 2.272 persoas. A construción, con 6,6% do paro galego, foi o único sector que rexistrou un descenso, con 33 persoas paradas menos. Á agricultura dedícase 3,2% dos parados no país, mentres que 9,9% pertence á industria e 9,1% non tiña emprego previo.
Na Galiza contabilizáronse 64.527 contratos en outubro, 8,12% menos que no mes anterior e 7,76% menos que hai un ano. Deles, 21.800 eran indefinidos, baixando 1,13% respecto a setembro e 11,56% en comparación con outubro de 2022.
Datos estatais
A nivel estatal, o paro subiu en 36.936 persoas (+1,3%), acumulando xa tres meses consecutivos de ascensos no desemprego. Ao finalizar o décimo mes do ano, o número total de parados mantívose por encima da barreira dos 2,7 millóns de persoas, da que baixara por primeira vez en 15 anos o pasado mes de xuño.
En concreto, outubro terminou con 2.759.404 persoas en paro, marcando, aínda así, o seu menor cifra nun mes de outubro desde 2007, segundo datos publicados esta sexta feira polo Ministerio de Traballo e Economía Social, que destacou que o aumento do desemprego en outubro deste ano é "máis moderado do habitual" neste mes, cunha poboación activa e ocupada en "máximos históricos".
De feito, exceptuando os outubros de 2022 e 2021, nos cales baixou o desemprego, o aumento do paro en outubro deste ano é o mellor rexistro neste mes desde 2007, ano no que aumentou en algo máis de 31.200 persoas.
Desde o inicio da serie histórica comparábel, en 1996, o paro subiu en todos os meses de outubro salvo en dous: en 2021, cando baixou en 734 persoas pola volta á normalidade tras a pandemia, e en 2022, cando se reduciu en 27.027 desempregados.
En termos desestacionalizados, o paro baixou en outubro deste ano en 6.883 persoas. No último ano o desemprego acumula un descenso de 155.488 parados, o que supón 5,3% menos, cun retroceso do paro feminino de 85.703 mulleres (-4,9%) e unha caída do desemprego masculino de 69.785 homes (-6%).
