agricultura

A Xunta da Galiza prohibiu as queimas de restos agrícolas e forestais realizadas por particulares a partir desta segunda feira e até novo aviso, o que implica que non se darán máis permisos e que os xa concedidos quedarán en suspenso. Segundo informou o Executivo galego, quedan excluídas desta prohibición as queimas controladas que executa o servizo de prevención en defensa contra os incendios forestais debidamente planificadas e dispondo dos medios de extinción precisos. A decisión tomárona tras avaliar a evolución da situación meteorolóxica e unha vez analizados os diferentes indicadores técnicos que inciden no risco de incendio. Tamén, detallou a Xunta, tendo en conta que a normativa prohibe as queimas cando as condicións meteorolóxicas poidan dificultar o seu control. A Consellaría do Medio Rural solicitou a colaboración da cidadanía para que extreme as precaucións e denuncie calquera actividade delituosa incendiaria da que teñan coñecemento.

Intereco, en colaboración co Consello Regulador de Agricultura Ecolóxica da Galiza (Craega), analizou esta cuarta feira nunha xornada en Compostela o 'greenwashing', unha táctica de mercadotecnia que engana facendo crer que unha empresa, campaña ou produto é respectuoso co medio ambiente cando non o é. Denuncian prácticas de 'branqueo ecolóxico' en campañas de Inditex ou Endesa.

O lugar de Meiro, no Concello de Bueu (O Morrazo) acolle esta fin de semana o Encontro e Degustación do millo corvo, unha variedade autóctona da Galiza que se cultivou durante séculos nesta bisbarra, sendo finalmente substituída por variantes máis produtivas e máis atractivas comercialmente. O labor de recuperación etnográfico, gastronómico e cultural da Asociación Cultural de Meiro permite que o millo corvo non sexa apenas unha lembranza.

O ministro español de Agricultura, Pesca e Alimentación, Luís Planas, reiterou esta terza feira que, en liña co "compromiso" coas explotacións agrícolas e gandeiras, presentou unha proposta "completa e traballada de medidas que dan resposta ás súas preocupacións". Así o fixo en resposta a unha pregunta parlamentaria no pleno do Senado sobre o documento que o Goberno estatal presentou antonte con 43 medidas, entre elas créditos ICO por valor de 700 millóns de euros, o reforzo da AICA (Axencia de información e control alimentarios) para mellorar o cumprimento da Lei de cadea alimentaria ou bonificacións fiscais. Con esta iniciativa, o Goberno estatal pretende dar resposta ás demandas de agricultoras e gandeiras co obxectivo de alcanzar un acordo e pór fin ás mobilizacións do campo. O Executivo español atópase agora á espera dunha resposta por parte das principais organizacións profesionais agrarias do Estado español a este documento. Neste sentido, o ministro apelou a que as forzas políticas dean liberdade a estes colectivos "para xulgar, sen presións de ninguén, o que deben decidir".

Segundo os últimos datos do Consello Regulador da Agricultura Ecolóxica (Craega), na Galiza hai 1.506 operadoras ecolóxicas. Na última década, aumentaron un 148%, chegando a 1.142 produtoras e 364 elaboradoras. A produción animal representa perto do 56%, a vexetal un 25% e acuicultura e algas un 18%.

O complexo agragandeiro da Ulloa observa con preocupación o proxecto de Altri para Palas de Rei. O conglomerado, conformado por 525 granxas, 14.097 cabezas de vacún e máis de 20 empresas de transformación, entende, maiormente, que a pasteira hipoteca a viabilidade dos seus negocios.

Ademais da pataca, UUAA considera o cereal un "piar fundamental" para a actividade agraria da comarca.

César Otero, co seu negocio, Pizzas do País, aposta por nutrirse dos ingredientes que ten ao seu redor para elaborar o seu produto final.

As altas temperaturas en inverno, xunto ás choivas intensas dos últimos días, están a afectar ao agro galego. Sectores como a horta e a froita tentan adaptarse ao novo clima para seguir no mercado. O grelo é o peor parado ao non contar con produción dentro da súa Indicación Xeográfica Protexida.

As protestas chegan á sede da Comisión Europea.

A protesta convocouse a nivel estatal con motivo da importante reunión do Consello de Ministros de Agricultura da UE en Bruxelas sobre o futuro da PAC e a posibilidade de 'relaxar' os requisitos ambientais.

A Comisión Europea ábrese agora a revisar estas normas, xa que algúns mecanismos de condicionalidade son "complicados" de aplicar, o que xerou o rexeitamento dos agricultores, que acusan tamén a carga burocrática da que agora quere libralos Von der Leyen.

Estas mobilizacións decorren de forma conxunta na cornixa cantábrica, convocadas polas organizacións agrarias. As reivindicacións pasan por prezos xustos para os produtos do sector primario, rexeitamento dos tratados de libre comercial, eliminación da burocratización, así como adaptación da Política Agraria Común (PAC).

O ministro ábrese a incrementar as inspeccións sobre o cumprimento da normativa.