A Coordinadora de Organizacións de Agricultores e Gandeiros (COAG), na que participa o Sindicato Labrego Galego (SLG) e Unións Agrarias (UUAA), que forma parte da Unión de Pequenos Agricultores (UPA), mantiveron esta terza feira unha reunión con outras federacións e sindicatos agrarios de Cantabria e Asturias, tras a cal anunciaron a táboa de reivindicacións comúns que defenderán nas mobilizacións que darán comezo o vindeiro 20 de febreiro.
Ese día darase o "disparo de saída" a unhas protestas que, de non atopar a resposta desexada, alongaranse no tempo, anunciaron as asociacións agrarias despois da xuntanza desta terza feira en Oviedo (Asturias).
O secretario de Coordinación Sectorial de UUAA, Félix Porto, detallou que as mobilizacións na Galiza vanse centrar na sede da Delegación do Goberno estatal na Coruña, así como nas tres Subdelegacións (Pontevedra, Lugo e Ourense). Ademais, haberá "moitos puntos" a nivel comarcal, segundo sinalou.
Porto explicou que "non se sentían representados polas concentracións decorridas, que teñen unha clara tinguidura política" e considerou que boa parte dos problemas teñen que buscar solución en Bruxelas.
"Hai que evitar o despoboamento rural e para iso necesítase que se poida vivir dignamente do campo", así como "servizos no medio rural", incidiu Porto, que sinalou que exixen que "se aplique dunha vez por todas a Lei de Cadea Alimentaria".
"Non existe negociación real entre produtores e industria, necesitamos dunha vez por todas desa negociación con mediadores e necesitamos observatorios de prezos", dixo o representante de UUAA.
Neste sentido, o ministro español de Agricultura, Luis Planas, reuniuse esta terza feira coas principais organizacións estatais do sector, despois de que o presidente do Goberno estatal, Pedro Sánchez, anunciara o reforzo da Lei da Cadea Alimentaria.
Pola súa parte, a Comisión Europea adoptou formalmente esta terza feira a derrogación dun ano das normas da Política Agraria Común (PAC) que obrigan as explotacións agrícolas a manter algunhas das terras en barbeito.
