Chega o Día de Defuntos, chave para o sector da flor: a metade da súa facturación anual concéntrase nesta data

A tradición de visitar os cemiterios e honrar os seres queridos polo Día de Defuntos, o 2 de novembro, converte esta data e os días anteriores en xornadas de actividade intensa para dous sectores económicos con certa presenza na Galiza: o da flor, en maior medida, e o da planta ornamental, que contan con vendas dalgúns produtos. Coa vista posta nestas datas, e na previsión meteorolóxica, traballan as empresas e cooperativas que se dedican ao sector da flor cortada. Destas últimas, a máis importante por volume de negocio -supera o millón de euros anuais- é Agroflor. Desde esta cooperativa, Raquel Díaz confirma a Nós Diario que estes días “son os máis importantes do ano, concéntrase case 50% da facturación anual”. A maior parte da produción, por este motivo, concéntrase no crisantemo “sexa en flor cortada ou en maceta” aínda que nas últimas campañas “as tendencias procuran os verdes e mesmo a presenza da rosa, un elemento moito máis delicado”. Entrada no tempo escuro: o de Defuntos, magostos, San Martiño e o gaélico 'Samaín' A entidade, nada en 1985, conta con viveiros en Paderne (As Mariñas), Cedeira (Ortegal), Narón (Ferrolterra) e Barreiros (A Mariña). Chegou a ter 90 asociadas e asociados e agora conta con 18. “Un dos problemas que temos é o relevo xeracional”, confirma, “e non é que non sexan rendíbeis, pois os ingresos económicos de cada explotación manteñen familias e a demanda continúa”, engade. Neste sentido, para atender todos os pedidos, parte do produto impórtase, pois chega de fóra. “Sobre todo caravel, que procede de Colombia, e rosas”, sinala Díaz. Planta ornamental O sector das plantas ornamentais na Galiza, segundo datos facilitados a Nós Diario pola Consellaría de Medio Rural, xera unha facturación superior a 60 millóns de euros e conta con 1.200 postos de traballo directos. Ademais, a metade da súa produción véndese no mercado internacional. Na Galiza hai en funcionamento 180 viveiros de planta ornamental, aínda que son 291 as empresas galegas inscritas no Rexistro Nacional de Produtores de Sementes e Plantas de Viveiro (Prosemplan). A entidade máis importante que os reúne é a Asociación de Empresarios Viveiristas do Noroeste (Asvinor). A facturación media dos seus membros, segundo apunta a Nós Diario o seu presidente, Santiago Ramos, ronda os 48 millóns de euros, entre planta ornamental e flores en datas sinaladas como o Día de Defuntos, no que predomina o crisantemo, ou o Día da Nai, no que é protagonista a rosa. Asvinor traballa os sectores de produción de planta ornamental, forestal e froiteira de toda a Galiza. Conta na actualidade con 50 membros asociados en todo país, mais cunha forte presenza en comarcas como o Baixo Miño, en concreto no concello de Tomiño. "Relacionado directamente co Día de Defuntos temos a venda de crisantemo, sobre todo na zona de Tomiño", explica Ramos. Aumentan os prezos e afecta o cambio climático As produtoras e produtores de flor, igual que aconteceu con outros sectores, tamén tiveron que incrementar os prezos este ano. “No noso caso, por exemplo, aumentamos dous euros o paquete de caraveis, que pasou de 10,99 euros en 2022 a 13 euros”, di Díaz, "pois encareceu o transporte e non nos quedou outra que modificar os prezos para clientes", engade. Porén, desde Agroflor teñen claro que “a xente por estas datas fai gasto, aínda que sexa gastando algo máis”. Pon de manifesto, así mesmo, as consecuencias do cambio climático na produción: “O feito de que teñamos moita calor en épocas que non toca, e logo moita chuvia, está a prexudicar moita da nosa produción”. Cabazas e magostos, símbolo da relación cos "nosos mortos" na festa do Samaín No caso da planta ornamental, as empresas atravesan unha situación semellante. “Agora mesmo a planta tería que estar en tempo de outono e en realidade está en crecemento, como na primavera, polas temperaturas que temos na Galiza”, salienta Ramos, e isto, agrega, "implica tomar decisións máis adiante, segundo se desenvolva a situación". A espera das florarías A Asociación de Floristas de Ourense (Aflor), da mesma maneira que outras floristas do país, teñen, ademais do tempo, a competencia dos produtos que veñen de fóra e que se comercializan en bazares e mercados. Desde Aflor, xa dixeron nalgunha ocasión que era unha “batalla perdida”. Ademais, moitos estabelecementos notaron o que consideran un "cambio de cultura" na tradición funeraria. É o caso de Teresa Vázquez, dona da floraría Marga, na Coruña, que afirma que teñen encargos, mais non tantos como outros anos. Asegura que leva "30 anos e detecto un cambio brutal", unha situación que relaciona coa incineración ou co temor das persoas maiores a acudir a cemiterios coa pandemia. "É un cambio cultural que vén para quedar", asegura, ao argumentar que, ao seu xuízo, non hai tanta tradición como antes. Promovendo na sociedade as flores e o seu mundo As entidades e cooperativas que teñen relación co mundo da flor apostan pola socialización da súa actividade. En Agroflor colaboran todos os anos con parte da súa produción en iniciativas como as alfombras florais de Ares, na comarca de Ferrolterra, -cunha doazón de 6.000 caraveis- e tamén en varias festas dos Maios de asociacións e colexios de concellos da contorna. Ademais, realizan visitas guiadas e obradoiros para varias Organizacións Non Gubernamentais (ONG) e asociacións sen ánimo de lucro xunto con charlas e outras actividades en centros educativos. Samaín: a noite das persoas que estarán sempre Cursos en Ourense Outra das entidades galegas moi activas na promoción social do mundo das flores é a Asociación de Floristas de Ourense. Cada ano realizan un curso de floristas na sede da Confederación Empresarial de Ourense (CEO) con profesionais internacionais que introducen esta profesión na Galiza. No último, realizado o pasado mes de xaneiro, participou Patricia Aguín, unha moza galega que se acaba de converter en campioa de España de arte floral e vén de participar tamén este ano no campionato mundial da cidade de Manchester (Reino Unido) en setembro, competición que rematou en quinto lugar.