luns 06.07.2020

O mel galego deféndese do mel foráneo

A negativa da Comisión Europea ao proxecto de real decreto do Ministerio de Agricultura que exixía dar a coñecer a procedencia do mel que se comercializa é outro atranco máis a un sector que non vive o seu mellor momento. Na Galiza, malia contar coa defensa de ter a etiquetaxe da Indicación Xeográfica Protexida (IXP), loitan contra os baixos prezos.   
Mel coa Indicación Xeográfica Protexida (IXP)
Mel coa Indicación Xeográfica Protexida (IXP)

Galiza produce 2,5 toneladas de quilos ao ano, unha cantidade que decreceu co tempo. "Hai 40 anos a produción por colmea era de 22 quilos e hoxe está en 15 quilos", explica a Sermos Galiza Xesús Asorei, secretario deAsociación Galega de Apicultura (AGA). "A calidade do noso mel, iso si, é moi superior a outros que se están a comercializar". O mel galego non se somete a ningún proceso industrial, basease no mel en frío con toda a súa composición biolóxica intacta.  "O mel industrial está sometido a altas temperaturas e perde todas as súas propiedades antibióticas e medicinais".

Competencia de mel barato

Desde AGA critican que Europa ceda diante das presións das grandes empresas do sector. "A industria manda máis que os produtores, interesáballe que fose así e os consumidores somos os máis prexudicados pola imposibilidade de saber a procedencia do mel", explica a Sermos Galiza o secretario da Asociación, "coa actual norma pode venderse mel que teña un 1% de produto local e un 99% de fóra sen especificar esta porcentaxe".

O mel que chega de fóra ten a súa orixe en países como China ou Arxentina.

O mel que chega de fóra ten a súa orixe en países como China ou Arxentina e o seu prezo é moito menor. "Fálase de que hai moitos laboratorios e que non é mel de abellas o que chega de fóra", relata a Sermos Galiza o secretario de AGA. Un dos xeitos de diferenciar o noso mel doutros é pola cor. "Contamos con dúas terceiras partes de monte e o noso mel procede de flores silvestres polo que a súa cor é moito máis escura".

Á espera de que o Goberno español presente un novo documento diante da Comisión Europea na Galiza temos dúas maneiras de consumir mel feito na Galiza. "Mercarmos en tendas e grandes superficies mel galego coa etiquetaxe da IXP de Mel de Galiza ou de xeito directo a través das 20 feiras que temos no país".

comentarios