Os Estados Unidos admiten a perda de relevancia do dólar como moeda de referencia global

Un informe do Centro de Investigación en Economía e Política (CEPR, polas siglas en inglés), con sede en Washington, en colaboración coa IESE Business School, con varias sedes no mundo, analizou esta semana as implicacións da posición actual do dólar no sistema monetario internacional. O CEPR afirma que "o uso do dólar estadounidense como unha arma (como un instrumento de presión a terceiros Estados do mundo) provocou preguntas fundamentais (en outros actores na escala global) sobre a dirección do panorama monetario internacional e creou unha oportunidade para a exploración de moedas de reserva alternativas". Paridade euro-dólar Unha teoría que foi referendada pola secretaria do Tesouro dos Estados Unidos de América (EUA), Janet Yellen, nas últimas horas. Yellen recoñeceu que as sancións económicas impostas por Washington están a obrigar aos Estados afectados a diversificar as súas reservas e a buscar alternativas á moeda dos EUA. "Non é sorprendente que os Estados que temen verse afectados polas nosas sancións busquen alternativas ao dólar. É algo que simplemente cabe esperar", afirmou durante unha comparecencia ante o Comité da Cámara de Servizos Financeiros dos EUA. Porén, na opinión de Yellen, o "importante papel" que xoga o dólar na esfera internacional seguirá sendo unha realidade. "Temos mercados financeiros líquidos e abertos, un forte Estado de dereito e unha ausencia de controis de capital que ningún Estado pode replicar. Non será fácil para ningún país", sinalou. Non obstante, a secretaria do Tesouro dos EUA si recoñece a posibilidade de que a divisa norteamericana ceda posicións nun futuro escenario mundial. A importancia da China O informe do CEPR indica que entre os Estados que están a reducir a súa dependencia do dólar destaca a China. O Estado asiático "actuou rapidamente", introducindo a primeira moeda dixital do seu banco central, o e-CNY, e lexitimando o yuan (a divisa chinesa) como "un rival lexítimo dos bancos estadounidenses e o Swift (unha rede internacional de comunicacións financeiras entre bancos e outras entidades financeiras que opera co dólar e reforza a divisa)". China: o factótum da política mundial Neste contexto, o informe argumenta que, a pesar de que a día de hoxe as alternativas á divisa dos EUA para as transaccións internacionais aínda teñen unha utilidade limitada, "é máis probábel que vexamos unha diminución gradual no dominio do dólar estadounidense". Ademais, o documento destaca que "a ruptura das relacións entre a China e os EUA "podería conducir a "unha maior polarización do sistema financeiro internacional e provocar graves ramificacións no comercio". Un extremo que tamén foi ratificado pola secretaria do Tesouro dos EUA, Janet Yellen, que considera como algo inconveniente que Washington abandone por completo as relacións comerciais coa China. "Aínda que seguramente temos preocupacións que deben abordarse (con respecto ás relacións bilaterais coa China), a desvinculación sería un gran erro", precisou a secretaria do Tesouro no seu pronunciamento na Cámara de Servizos Financeiros. "Creo que nós gañamos e a China gana cando o comercio e o investimento son o máis abertos que sexa posíbel, e sería desastroso para nós tentar desvincularnos da China", recalcou Yellen, que resaltou que se trata dunha "interacción moi valiosa". As persoas usuarias dos EUA "benefícianse enormemente" na medida en que poden adquirir bens que son máis baratos de fabricar na China, que pola súa parte saca proveito das exportacións estadounidenses, e que ao mesmo tempo sustentan e impulsan a economía do Estado norteamericano, explicou. "A nosa competencia coa China é unha competencia sa. Do mesmo modo que a nivel estatal, cando as empresas compiten entre si, prodúcese unha innovación máis rápida e un progreso tecnolóxico máis rápido que beneficia a todos os implicados con produtos mellores e máis baratos ao longo do tempo", dixo. O Foro Económico de San Petesburgo comezou esta cuarta feira Neste contexto de competencia entre o dólar e outras divisas a nivel global, comezou esta cuarta feira en San Petersburgo (Rusia) o XXVI Foro Económico Internacional (SPIEF). No evento, que terá lugar até o sábado 17 de xuño, participan delegacións de máis de 100 Estados de todo o mundo. Este ano asistirán ao foro, cuxo tema principal é "Desenvolvemento soberano, a base dun mundo xusto. Unamos esforzos polo ben das xeracións futuras", delegacións de máis de 20 Estados africanos. Do lado do sueste asiático, participarán Estados como Indonesia, Malasia e Tailandia. Ademais, do Medio Oriente terán presenza Emiratos Árabes Unidos, Arabia Saudita, Qatar e Barhein. A China, Vietnam, Irán e Siria tamén contarán con representación en Rusia, así como delegacións gobernamentais de máis de 20 Estados do continente americano, entre eles a Arxentina, o Brasil, Venezuela, Cuba e México. "Os cambios xeopolíticos sen dúbida cobráronse o seu prezo (en termos de participación dos diferentes Estados do mundo). Mais a representatividade do SPIEF segue sendo moi alta. Segue sendo un evento mundial", asegurou o gobernador de San Petersburgo, Alexánder Beglov, que adiantou que se abordarán temáticas como a cooperación no sector das tecnoloxías da información, a construción naval, a medicina e a educación. O Goberno arxentino quere renegociar o acordo Mercosur-Unión Europea O Executivo da Arxentina expresou que espera "estar en condicións" de presentar unha contraproposta a Bruxelas do acordo Unión Europea-Mercosur a finais de xuño, co obxectivo de incluír salvagardas que impidan ou conteñan os efectos adversos sobre as exportacións arxentinas que terían as medidas "unilaterais" propostas por parte da Unión Europea (UE) con "pretendidas" finalidades ambientais para condicionar o pacto. A UE busca en Mercosur un socio para reducir a súa dependencia dos EUA e da China Así se desprende do Informe de Xestión presentado polo Goberno arxentino, no que se recolle que os obxectivos de Bruxelas a raíz dos distintos acordos climáticos (como a aprobación do Pacto Verde ou da Lei do Clima, e as súas directrices derivadas) afectaron "sensibelmente" o ritmo e a orientación da política comercial adoptada pola UE. As regulacións do Pacto Verde Europeo non forman parte do acordo entre a UE e Mercosur, mais aplicaranse de maneira xeral e terán impacto tanto para as empresas dos Estados do bloque comunitario como para calquera empresa que exporte ou desexe exportar á UE, incluídas as empresas do bloque de Mercosur, expón o informe. Esta mesma semana, o presidente da Arxentina, Alberto Fernández, reuniuse coa presidenta da Comisión Europea, Ursula Von der Leyen, e pediulle que o acordo sexa "equilibrado" entre as economías de ambas as rexións. Neste sentido, o departamento de Exteriores arxentino solicitou que se teñan "en conta" as diferenzas nos niveis de desenvolvemento entre bloques, que impiden a extrapolación directa do modelo da UE.