Máis da metade dos fogares galegos (56,02%) ten dificultades para chegar a fin de mes, unha misión especialmente complicada para un de cada dez (9,94%) que o fan con moitas dificultades. Así se desprende da Enquisa conxuntural a fogares presentada esta cuarta feira polo IGE, con datos referidos ao derradeiro trimestre de 2023, que reflicte o impacto dunha inflación que en novembro pasado —último dato dispoñíbel— elevou os prezos na Galiza un 3,3% en comparanza co mesmo mes do ano anterior. Os alimentos foron o que máis encareceu neste período (9,6%).
E, pola contra, menos do 44% das familias galegas chegaron con facilidade ou moita facilidade a fin de mes entre outubro e decembro de 2023, dous puntos porcentuais menos que de xullo a setembro, cando representaran o 46,23%. É a taxa máis baixa desde o primeiro trimestre de 2021 (42,93%), cando os efectos derivados da pandemia da Covid-19 lastraban a economía familiar especialmente na Galiza, que foi a segunda comunidade autónoma na que máis se disparou a inflación desde o estalido da crise sanitaria en marzo de 2020 até a actualidade: nada menos que un 19% de suba xeral dos prezos.
Unha repunta, porén, que non se ve correspondida co aumento do salario medio, que ao feche de 2022 —último dato— subira 3,1%, menos da metade que o IPC anual ao remate dese ano (6,4%). O salario medio superou o pasado exercicio por vez primeira o limiar dos 2.000 euros na Galiza —2.056,5—, mais ficou novamente por baixo da media estatal —2.128,4 euros—.
Os fogares unipersoais son os que experimentan maiores dificultades para acabar o mes (66,47% do total), mentres as parellas sen fillos fican no lado oposto da balanza (48,09%). En termos globais, a alza dos prezos provocou que un de cada catro fogares (24,76%) non se puidese permitir ningún gasto 'extra'; é dicir, nin aforrar cartos, nin marchar de viaxe, nin saír a cear fóra, entre outros. O 20,6% reduciu o diñeiro destinado a electricidade, transporte ou roupa, e até 30% do total cambiou os seus hábitos de consumo para gastar menos.
Da mesma estatística do IGE despréndese que o 3,76% dos fogares tivo algún atraso no pagamento de recibos de obrigado cumprimento —hipoteca ou alugueiro, luz, gas, auga, etc.— nos últimos tres meses, nove décimas máis que no trimestre precedente e o dato máis elevado desde comezos de ano.
