Ante os indicios de clara irregularidade fiscal, cando non de delito, a Fiscalía Anticorrupción pediu formalmente a Facenda que lle dea traslado sobre todos os pagamentos realizados polo Partido Popular desde 2000.
É obvio que nos pagamentos a Facenda o PP non tería rexistrado ningún ingreso en negro, como tamén é obvio que nin nas declaracións da renda nin nas do patrimonio de empregados e dirixentes do partido van aparecer rastros do diñeiro en B.
Onte, o ex tesoureiro do PP -ao que o partido pensa demandar, segundo anunciou onte o seu portavoz- negou categoricamente a existencia de ningunha contabilidade irregular e atribuiu o escándalo a unha manipulación.
Sumouse así á estratexia de Rajoy. Mais, identicamente ao presidente do goberno, non identificou @s artífices da manipulación. Si dixo, en todo caso, que a manipulación é produto dunha persoa que tivo acceso á contabilidade real do PP.
O que tampouco explicou é como co seu salario puido acumular até 22 millóns de euros, depositados nunha conta en Suiza.
Por súa parte, e segundo publica El Mundo, Facenda vai denegar a amnistía fiscal tramitada por Bárcenas, ao que acusa de engano por atribuír fondos que posúe desde 2006 a unha sociedade criada en 2008.