As previsións da Autoridade Independente de Responsabilidade Fiscal (AIReF) empeoran en catro décimas as previsións de déficit a feche de 2023 para Galiza, até supor o 0,2% do PIB, lixeiramente inferior ao déficit de 0,3% do PIB previsto pola Xunta. Con todo, a AIReF prevé que a comunidade alcance un superávit de 0,7% do PIB en 2024, mentres desde a Administración estiman alcanzar o equilibrio orzamentario.
Nun informe publicado esta quinta feira, a AIReF empeora as súas estimacións respecto ao informe de xullo. "Os datos de execución á data mostran un crecemento do gasto non vinculado a fondos Next Generation EU superior ao estimado no informe anterior, que, xunto a peores previsións no Impostos sobre Transmisións Patrimoniais e Actos Xurídicos documentados, anulan o maior nivel de partida rexistrado noutros ingresos no peche actualizado de 2022 e a maior recadación esperada por fondos europeos", sostén.
A AIReF considera que a débeda da Galiza situarase ao remate de 2024 arredor de 14,8% do PIB. Parte dun 17% en 2022, de modo que a ratio melloraría en 2023 por efecto do crecemento previsto do PIB, e en 2024 por este mesmo efecto máis o superávit previsto para o devandito exercicio.
No tocante a fondos europeos, até 2022 executouse na Galiza perto de 50% dos fondos REACT-EU asignados ao país, á vez que se espera que en 2023 rexístrese o importe pendente. "Coa actualización dos datos de feche de 2022, revisáronse lixeiramente á baixa os fondos REACT-EU rexistrados pola Galiza á data, que suporían perto do 50% dos fondos asignados (441M€)", explica. En consecuencia, o remanente que se executará en 2023, de 52%, é lixeiramente superior ao estimado pola AIReF no informe de xullo.
"A previsión das liñas fundamentais remitida pola Galiza para 2024 rexistra un escenario de ingresos prudente e un crecemento dos empregos en liña co estimado pola AIReF unha vez depurados os ingresos e gastos vinculados a fondos europeos, de impacto neutro no saldo", estima a autoridade independente.
Rebaixas fiscais
No apartado de rebaixas fiscais da Xuna, a AIReF explica que o país valora en 17 millóns a menor recadación esperada do imposto de patrimonio pola bonificación do 50% da cota e en 2,2 millóns a menor recadación esperada no imposto de sucesións e doazóns polas reducións de tipos aprobadas para a adquisición de actividade económica aprobadas pola Lei 7/2022 de medidas fiscais.
"Respecto ao IRPF, Galiza aprobou pola lei 18/2021 de medidas fiscais e administrativas a modificación da escala da tarifa sobre a renda de 2022, cuxo impacto recadatorio valorou en 67 millóns. O impacto desta medida xa se rexistrou nas entregas a conta de 2023, pero en 2024 terán un efecto adicional nos ingresos da Galiza pola vía da liquidación de 2022", agrega.
Paralelamente, cuantifícase en 62 millóns a rebaixa no IRPF —do primeiro tramo de 9,4 a 9% e deflactación dos tres primeiros tramos da tarifa—, que terán efecto tanto nas entregas a conta de 2024 como na liquidación de 2022.
