Os adiantos das axudas da PAC, por baixo da contía de 70% aprobada por Bruxelas debido ás demoras da Xunta

Desde esta semana e até o vindeiro 30 de novembro, o conxunto de profesionais da agricultura e da gandaría da Galiza percibirán 48 millóns de euros de adianto correspondentes ás axudas directas da Política Agraria Común (PAC), despois de que o Goberno estatal, a través do Ministerio de Agricultura, Pesca e Alimentación (MAPA), dese a orde. Porén, o adianto concedido ao sector agrogandeiro non chega a 50% do total, cando a porcentaxe deste primeiro pagamento podería ter alcanzado até 70%. O Executivo do Estado español solicitou á Comisión Europea, que finalmente o autorizou, incrementar até 70% este anticipo no contexto dunha campaña marcada polo déficit de precipitacións e o aumento de custos de produción, entre outras circunstancias, co obxectivo de dotar de maior liquidez as explotacións. Para poder facer emprego desta prerrogativa, cada unha das autonomías do Estado español debería ter solicitado ao MAPA o importe dese anticipo. Non obstante, a partir dos datos do Ministerio, soamente Castela e León tería demandado a contía suficiente para poder proceder ao pagamento de 70% da estimación das axudas directas totais solicitadas, mentres que Asturias, Estremadura, Nafarroa e o País Valencià estarían en condicións de proceder ao reparto de anticipos superiores a 50%. Edelmiro López: "O sector agrario galego é dos que menos depende das subvencións que chegan a través da PAC" En consecuencia, a Xunta da Galiza atópase entre as autonomías do Estado español que non van exercer a facultade extraordinaria que permite a Comisión Europea de proceder a ingresar anticipos de até 70% das axudas directas da PAC, polo que o sector agrogandeiro galego non vai percibir a totalidade do adianto que tería dereito a cobrar. A Fruga solicita solucións A respecto desta cuestión, o coordinador xeral da Federación Rural Galega (Fruga), Manuel da Cal, denunciou esta cuarta feira que "esta problemática débese fundamentalmente aos problemas e incidencias do programa informático galego e ao aumento dos prazos de solicitude das axudas por parte da Administración, o que derivou nun menor prazo para realizar os controis administrativos, algo que non é atribuíbel ás persoas solicitantes". A Fruga pide a execución das axudas para explotacións de tenreira galega Neste sentido, o coordinador xeral da Fruga solicitou á Xunta que adopte as medidas necesarias para que, "canto antes", o sector agrograndeiro poida acceder a un anticipo de 70%. Prazos de abonamento O importe das axudas directas para o Estado español ascende a 4.875 millóns de euros, mais o requirido polas autonomías, de momento, ascende a 2.453 millóns de euros, o que supón 50,3% do total, lonxe da porcentaxe de 70% que permitiu o Executivo da Unión Europea (UE). O resto dos pagamentos directos da campaña da PAC -aqueles non incluídos nos adiantos- teñen que ser abonados ao sector de cada autonomía a partir do día 1 de decembro, concluíndo o prazo o 30 de xuño de 2024. As autonomías que participan no sistema de prefinanciamento dos fondos da PAC (todas menos Canarias e Euskadi), coordinado polo Fondo Español de Garantía Agraria (FEGA), comunicaron as súas previsións de pagamento de anticipos por unha cantidade próxima a 2.500 millóns de euros -podería ter chegado a 3.400 millóns de euros-, dos que máis de 1.300 millóns abonaranse entre o 16 e o 20 de outubro. Os prazos de pagamento mantivéronse como en campañas previas, a pesar de que o período de solicitudes atrasouse respecto a exercicios anteriores, xa que empezou o 1 de marzo e prolongouse até o pasado 30 de xuño. Nesta campaña de 2023 poderanse abonar anticipos para a axuda básica á renda para a sostibilidade e os seus pagamentos complementarios (pagamento redistributivo e pagamento a persoas mozas), os ecorrexímenes e as axudas asociadas, mentres que as de engorde de tenreiros e o pagamento específico ao algodón poderanse abonar desde o 1 de decembro deste ano. Cadernos de explotación Outro dos problemas no ámbito da PAC que destacou o coordinador xeral da Fruga, Manuel da Cal, en conversa con Nós Diario, é o derivado da implantación do chamado caderno de explotación dixital -usado para anotar a utilización de fitosanitarios e fertilizantes-, que entrou en vigor de forma progresiva o pasado 1 de setembro, e que supón cambiar do soporte en papel do caderno de explotación tradicional cara a un soporte dixital. A Política Agraria Común 2023-2027, novidades nas axudas ás explotacións Desta forma, estabelécese un período para que as explotacións agrogandeiras se adhiran ao novo método, algo que segundo sinala Da Cal, "está facendo que moita xente maior pense en deixar as explotacións, pois o nivel de burocracia, gasto e adaptación, nunha situación xa complicada, non compensa cando faltan poucos anos para a túa xubilación ou cando mantés a actividade máis alá dos 67 anos". "Bruxelas introduce cada vez máis normas que implican máis burocracia e máis necesidade de empregar os medios telemáticos, mais que non achegan unha maior seguridade alimentaria. Pode que a xente moza, con esforzo, se adapte, mais isto supón unha barreira para as persoas maiores", denuncia Da Cal. As plantacións vinícolas ven ampliada a súa autorización As autorizacións de plantacións vinícolas que caducaban en 2023 viron ampliada en 12 meses a súa vixencia por parte do Goberno do Estado español, segundo recolleu o Boletín Oficial do Estado (BOE) publicado esta cuarta feira. En concreto, o novo real decreto, aprobado polo Consello de Ministros e Ministras, persegue a aplicación da flexibilización de varios regulamentos para que os produtores hortofrutícolas e vitivinícolas se beneficien das axudas sectoriais ante a dificultade de poder cumprir con certos requisitos, debido a fenómenos climáticos adversos e por perturbacións do mercado. Renuncias aos permisos En materia de plantacións de viño tamén se permite que os titulares destes permisos poidan renunciar a eles sen ser sancionados, sempre que o comuniquen antes do 31 de decembro ante a autonomía que concedeu a licenza. Nas operacións de reestruturación e reconversión de plantacións enmarcadas no Programa de Apoio ao Sector Vitivinícola (Pasve) permítese xustificar 3% do gasto no canto de 30% para continuar a execución das operacións no marco da nova Intervención Sectorial Vitivinícola (que substitúe o Pasve) se as operacións foron iniciadas antes do 15 de outubro.