A axenda deportiva da Pobra do Caramiñal estará protagonizada no mes de abril polo remo, pois os bateis vogarán polas augas da localidade do Barbanza nas dúas próximas fins de semana nas categorías alevín, infantil, cadete, xuvenil, Sub-23 e absoluta.
O primeiro evento será o Campionato de Bateis Provincia da Coruña, que se disputará a partir das 11 horas dos días 13 e 14 de abril, cando teñen lugar a fase clasificatoria e a final, respectivamente. Desta última sairán as catro primeiras tripulacións para o gran evento da tempada a nivel nacional, o Campionato Galego de Bateis Xunta da Galiza, programado os días 20 e 21 de abril desde as 11 horas
En total, segundo destacaron desde a organización -a cargo da Federación Galega de Remo (FGR)-, tomarán parte en ambas as probas arredor dun cento de equipos e 700 remeiros e remeiras de todo o país.
Durante a súa presentación, esta segunda feira no Concello da Pobra, o concelleiro de Deportes, Eloy Sobrido, destacou o "excelente" campo de regatas do que dispoñen e o bo nivel que vén acreditando nos últimos tempo o Club Remo Pobra.
O seu presidente, Emilio Dieste, tomou a palabra despois do edil para incidir na "relevancia" de que ambas as citas se desenvolvan na localidade, e adiantou que o calendario "medrará" co paso do tempo.
