As Rías Baixas esperan a chegada de 4.000 participantes e de 10.000 visitantes durante a Gran Final das Series Mundiais de Tríatlon, asegurou o alcalde de Pontevedra, Miguel Anxo Fernández Lores.
O Concello e a Deputación de Pontevedra veñen de asinar o convenio de colaboración para o desenvolvemento desta cita deportiva.
A final das World Triathlon Championship Series é un evento de primeiro nivel que terá como sede a cidade do Lérez, que se converterá na capital mundial desta disciplina deportiva.
Proxección internacional
A Deputación achegará 500.000 euros para facer fronte aos gastos relacionados co desenvolvemento do campionato do mundo. Era un compromiso adquirido xa desde o ano pasado, lembrou Fernández Lores.
"Este é un evento que transcende a cidade, é un evento que terá unha repercusión notábel en todas as Rías Baixas e que achegará até estas terras a máis de 4.000 triatletas, ademais de equipos técnicos, organizativos, familiares e espectadores ".
Contará con proxección internacional. "Falamos dun evento que será retransmitido en ducias de países", indicou Lores. "Tanto a cidade de Pontevedra como todas as Rías Baixas terán unha proxección importantísima. A Deputación debería participar nesta cita e participará, algo que agradezo de xeito público ".
Neste sentido, o rexedor avanzou que estudarán a repercusión económica desta cita deportiva, antesala da final do Mundial Multideporte en 2025 e que tamén terá lugar en Pontevedra.
