O Parque Náutico de Castrelo de Miño acollerá o próximo domingo, día 20 de febreiro, a XXII edición do Campionato de España de Remo de longa distancia, a primeira proba estatal da tempada 2022.
Nas instalacións do sur da Galiza congregaranse máis de 500 deportistas de 44 clubs procedentes de oito territorios do Estado diferentes, sendo a armada galega a máis numerosa con 13 equipos, seguida dos sete de Euskadi e Catalunya e os seis do País Valenciano.
Os remeiros e remeiras das 305 embarcacións inscritas, tanto individuais como dobres e pertencentes ás categorías cadete, xuvenil, absoluto e para-remo (denominación correspondente ao remo adaptado) terán que completar un percorrido de 5,5 quilómetros que principia augas arriba do río Miño e remata no parque de Castrelo.
Organizado polas federacións española e galega de remo, e coa colaboración da Deputación de Ourense, este campionato de España "supón un enorme esforzo para o parque náutico, xa que despois da apertura da tempada a fin de semana pasada coa proba a nivel galego, agora imos reunir perto de 600 persoas entre deportistas, adestradores, delegados e xuíces", segundo explicou o alcalde de Castrelo de Miño, Avelino Pazos.
Ao longo deste ano, destacou, están previstas case unha vintena de probas nacionais, estatais e internacionais, entre estas últimas un evento tan destacado como é a Coupe de la Jeunesse (do 5 ao 7 de agosto), "un dos certames de remo máis prestixiosos do mundo, que cada ano reúne centos de deportistas procedentes de 16 países europeos e que confirma a vontade de situar Ourense como un dos grandes territorios de remo e de piragüismo de España e Europa", apostilou o rexedor de Castrelo.
