O ex lateral dereito e capitán durante anos do Real Club Celta Hugo Mallo —actualmente nas filas do Internacional de Porto Alegre brasileiro— deberá ir a xuízo acusado dun suposto delito de abuso sexual, segundo avanza o Diario AS. O incidente produciríase o 24 de abril de 2019, instantes antes de que dese comezo o encontro entre o Espanyol de Barcelona e os celestes no estadio de Cornellà, correspondente á tempada 2018-19.
O citado xornal apunta que a denunciante sería unha muller que nese partido recibía os xogadores de ambos os equipos no céspede disfrazada da mascota do equipo, un 'periquito'. "Cando Hugo Mallo chegou á altura das mascotas, ao periquito deulle a man como se fai habitualmente pero cando chegou á Sra. Ana —nome ficticio para preservar o anonimato da presunta vítima—, que nese momento estaba a facer o papel da 'periquita', este introduciu as mans baixo o disfrace e fíxolle tocamentos nos peitos", recolle o atentado, sempre segundo a información achegada por AS.
Agora, o Xulgado do Penal número 19 de Barcelona acollerá o próximo 11 de xullo de 2024 o xuízo oral mediante procedemento abreviado dunha causa por abusos sexuais —e non agresión, xa que no momento dos feitos, o 24 de abril de 2019, así o determinaba o Código Penal vixente— na que tanto a Fiscalía como a defensa da vítima coinciden en pedir para o defensa unha pena de 24 meses de multa.
