Esta sexta feira comezará unha nova tempada da Liga LEB Ouro estatal con 18 equipos, dous deles da Galiza.
O sistema de competición non mudou desta vez alén da realización dun sorteo asimétrico no que non coincidirán a orde dos enfrontamentos da primeira e a segunda volta.
Da liga regular sairán o campión, e primeiro ascendido á ACB, e os tres descendidos á LEB Prata, que serán os tres últimos da clasificación.
En relación á participación galega, o Basquet A Coruña viaxará até Sevilla para enfrontarse esta sexta feira ao Real Betis Baloncesto (Pavillón San Pablo, 20.30 horas).
No equipo segue Diego San Epifanio e o bloque de xogadores que fixeron a pasada campaña.
O Club Ourense Baloncesto, pola súa parte, xogará o sábado na casa contra o TAU Castelló (Pazo dos Deportes Paco Paz, 19 horas).
O equipo está renovado por completo, con 12 xogadores que deben axustarse e coa continuidade de Félix Alonso. A formación da cidade das Burgas conta con ter unha boa entrada após anunciar esta semana que superou a cifra de 1.500 socias e socios.