A XXI edición do Festival de Cans, xa ten datas para 2024. O festival desenvolverase ao longo de cinco días, entre a terza feira 21 e o sábado 25 de maio.
Así o decidiu a asemblea da Asociación Cultural Arela, entidade organizadora do Festival de Cans desde a súa primeira edición, celebrada no ano 2004. O certame regresa así ás súas datas naturais na cuarta semana de maio, coincidindo coas datas do Festival de Cannes francés, após que o pasado ano tivese lugar na terceira semana do mes, cadrando coa semana das Letras Galegas.
Despois da decisión da asemblea, o festival comunicou xa as datas ás veciñas e veciños que prestan as súas casas e colaboran co festival, así como ás institucións, patrocinadores e empresas locais que apoian o certame.
O festival de Cans foi elixido o pasado ano como unha das grandes referencias culturais da Galiza, segundo o estudo promovido pola Fundación Contemporánea, referente dos estudos culturais no Estado, e recibiu recentemente o Premio CREA á súa traxectoria, outorgado por esta asociación que reúne perto de 200 directores e directoras de cine de toda a Galiza.
A organización traballa agora mesmo en reunións con institucións e na procura de patrocinios para a nova edición. Nos vindeiros días o certame anunciará a apertura da súa convocatoria para recibir obras que desexen participar na nova edición do festival.
Por outra parte, o ciclo Cinemaldea, que o Festival de Cans promove co Concello do Porriño, para levar o cinema ás aldeas do municipio, rematará este domingo 3 de decembro.
A derradeira das proxecións terá lugar no Centro cultural ás 17,00 horas e contará coa presenza do cineasta de Marín Ángel Santos, triunfador da última edición do Festival de Cans co filme Alicia fai cousas.
