O Festival de Cans recibirá esta cuarta feira, 9 de agosto, o Premio Alecrín da Cultura, concedido pola Federación de Entidades Culturais Galegas de Catalunya (Fegalcat). A asemblea desta Federación, que agrupa catorce entidades culturais galegas en toda Catalunya, quixo conceder ao Festival de Cans o Premio á Promoción Cultural, valorando a traxectoria do certame no ano en que celebra o vixésimo aniversario.
A entrega destes premios terá lugar nun acto que se celebrará no Castelo do Concello ourensán de Castro Caldelas, presidido pola alcaldesa da localidade, Sara Inés Vega. A este acto asistirá o director do Festival de Cans, Alfonso Pato, que recollerá o galardón no nome de toda a organización.
Xunto co Festival de Cans, recibirán este premio outras personalidades destacadas da cultura galega, como a escritora María Xosé Porteiro en Literatura, o escultor Acisclo Manzano en Artes ou o histórico grupo Leilía, que este ano anunciou a súa retirada dos escenario, na categoría de Música.
Presenza de galegos en Catalunya
Os Premios Alecrín entréganse desde hai quince anos, para recoñecer o traballo a prol da cultura de asociacións, empresas e entidades galegas. Cada ano celébrase o acto de entrega nun concello galego diferente, case sempre vinculado á presenza de galegos en Catalunya
O Festival de Cans suma deste xeito un novo galardón, nun ano tan especial para a organización como é o do seu vinte aniversario. Este premio suma o noveno recoñecemento do certame ao longo das súas dúas décadas de vida. O Festival de Cans é o festival de cine e de música que obtivo máis premios na Galiza.
Entre estes está o Premio da Cultura Galega -a primeira vez que o recibía un festival de cinema- ou o Premio da Crítica á Innovación Cultural, concedido en 2009, outorgado pola histórica Fundación Premios da Crítica.
