Vinte anos de música e sardiñas no Revenidas

O festival Revenidas regresa a Vilaxoán (O Salnés) e entra nunha nova década co seu 20 aniversario. Moitas cousas mudaron desde ese ano 2003 no que, como explica en declaracións a Nós Diario Xoán Quintáns, director do festival, "un grupo de rapaces e rapazas decidimos crear unha actividade cultural nunha zona na que non había demasiada oferta artística". Daba así comezo un proxecto co espírito dunha antiga tradición da localidade, a festa das sardiñas revenidas, e que, a día de hoxe, conseguiu transformarse nun dos festivais de música con máis sona da Galiza. Aínda así, poden sumarse días, aumentar a capacidade de convocatoria, incorporarse novas actividades á programación, crecer o número de artistas participantes ou superar calquera expectativa, que, a pesar de todo, o Revenidas segue sendo fogar para os habitantes de Vilaxoán, afirmando Quintáns que desde o festival procuran "reivindicar un lugar que ten moito que dar". Así, a esencia desta vila mariñeira, na que se construíu a primeira batea da ría da Arousa, aparece impregnada no festival desde o seu propio nome, referíndose as Revenidas a un tipo de sardiñas típicas da zona. Talento galego, feminino e emerxente daranse cita en Vilaxoán da man do Revenidas De feito, a festa tradicional celebrábase coincidindo coa época da salgadura, cando a veciñanza se reunía nas inmediacións do parque de Dona Concha para compartir un xantar en comunidade. A tradición perdeuse durante a Guerra Civil e, a pesar de que houbo intentos de recuperala nos anos 80, a proposta non conseguiu consolidarse até principios dos 2000 e, de feito, no Revenidas a sardiñada non se incorporaría até a súa segunda edición, momento no que, como asegura Quintáns, "se consolidou o modelo de festival". Novas conquistas Conforme ían pasando os anos, con tino e pouco a pouco, novas conquistas ían chegando ao festival Revenidas. Desde crecer de un a cinco días de celebración (como foi o caso da edición do ano 2022), até incorporar a acampada no ano 2008, pasando por estrear a páxina web ou aumentar dos 15 grupos participantes no ano 2011 ás máis de 35 agrupacións que se achegarán a Vilaxoán os próximos días 7, 8, 9 e 10 de setembro. Nun proxecto que mestura un cartaz de concertos principais con actividades paralelas de balde; a gastronomía, a gala de circo solidaria ou a feira revenida son algúns dos complementos para un festival que este ano ten todos os abonos vendidos e as entradas por días practicamente esgotadas, chegando a afirmar Quintáns que "o nivel de profesionalización que ten o Revenidas nunca o soñou, nin se nos pasou pola cabeza". Tanxugueiras, Antía Ameixeiras e Su Garrido entre as artistas dos concertos a bordo do Revenidas É este grao de aceptación e as boas previsións o que levaron a organización a incorporar neste trinta e cinco aniversario un novo espazo de acampada. Aínda así, a morte de éxito non se observa no horizonte, porque nun Revenidas que non deixa de medrar, o aire sopra a favor. Algo máis sinxelo de conseguir cando se manteñen unhas raíces asentadas, uns principios básicos e un compromiso constante. Por iso, desde a organización destacan que "unha liña de programación moi marcada", coa que diferenciarse doutros festivais, e "un público moi fiel" son as claves do éxito do proxecto. E a pesar de ser conscientes de que "quen xoga noutra liga, xoga distinto", desde o Revenidas non o dubidan e prefiren "apostar polo noso" cun cartaz cunha "presenza moi importante de grupos galegos e estilos diversos". Un cartaz punteiro Desde o neofolk das Fillas de Cassandra ou Mondra até a mestizaxe de Lamatumbá, esta é unha edición especial para algunhas das agrupacións que se achegan a Vilaxoán. Así, o grupo fusión de ska, punk e reggae, Dakidarría celebra no Revenidas o seu 20 aniversario cunha gravación do directo do concerto. Especial mención merece o regreso aos escenarios de Heredeiros da Crus, que chegan a Vilaxoán despois dunha pausa por problemas de saúde. A nova escena latinoamericana está tamén presente a través da artista Ana Tijoux ou a activista feminista arxentina Sara Hebe. A Gala Solidaria do Revenidas acolle circo, maxia, música e clown HYDN, gañadora do concurso de bandas Sonidos Mans que dá acceso a actuar en diferentes festivais da Galiza, será outra das voces que porá música ao Revenidas. O rap do grupo valenciano Los Chikos del Maíz, a electrónica euskera de Zetak ou as últimas incorporacións ao cartaz de Panteón Rococó e La Élite, son algúns dos máis de 35 grupos que porán a banda sonora do festival de Vilaxoán. A pesar de que, como asegura Quintáns, o Revenidas "non encaixa en ningún estilo", a maioría son "grupos comprometidos" e asegura que na programación procuran "innovar e repetir porque hai boa canteira". A programación completa do evento fechouse o 29 de agosto co anuncio dos concertos a bordo e do roteiro musicado por Vilaxoán de man do músico e escritor Xurxo Souto. Así, a Chasula sucará a ría ofrecendo unha degustación de produtos típicos coa música de Zeltia Irevire, Sheila Patricia e Antía Ameixeiras o sábado día 9 e MJ Pérez, Su Garrido e Tanxugueiras o domingo 10. Un cartaz feminino para os encontros máis íntimos do festival, cun aforo máximo de 12 persoas. Panteón Rococó e La Élite completan o cartel do Revenidas Outra das claves do Revenidas e a súa Gala do Circo solidaria. Un evento destinado a axudar o pobo Saharauí e que serve como punto de encontro para algúns dos grandes artistas de circo e música infantil. Nesta nova edición, a irreverencia de Peter Punk, o ilusionismo do Mago Paco, o clown dos Països catalans de Nono, a compañía de circo Asacocirco, o espectáculo Heinrich, aprendiz de mago de Simplemente Enrico e as versións rockeiras da música tradicional de Uxía Lambona fecharán estas xornada de festa, música e sardiñas que seguen enchendo a vila de troula.