Montse Fajardo, biógrafa de Virxinia Pereira, protagoniza o 'Sermos Galiza' deste sábado

Aliás, falamos da desaparición de 'Teima' hai 45 anos.
Adianto do 'Sermos Galiza' deste sábado.
photo_camera Adianto do 'Sermos Galiza' deste sábado.

Este sábado atoparás nos quiosques, xunto ao teu exemplar de Nós Diario, o semanario Sermos Galiza, que protagoniza a entrevista de Montse González a Montse Fajardo, autora de A vida incerta, a biografía de Virxina Pereira.

"Ela fala de Galiza, dun pobo asoballado. Define Galiza como nación e deféndea contra o que están a facerlle os franquistas, ademais de defender a legalidade republicana", explica Fajardo.

45 anos da desaparición de 'Teima'

Sermos deste sábado abre cunha reportaxe de Xosé Barros titulada 'Teima: xornalismo desde o silencio', con motivo do 45 aniversario da publicación do derradeiro número da revista.

O final de Teima chegou en agosto de 1977, nove meses despois do seu primeiro número. 35 edicións dun semanario, afogado a nivel interno pola imposibilidade de conseguir anunciantes que evitasen o colapso económico da revista, e a nivel externo polas tensións existentes entre o PSG, a UPG e o Partido Comunista Español (PCE). Os dous factores confluíron para provocar a desaparición do xornal.

As miradas complementarias de Juan Prieto e Faustino Patiño

Por outra parte, Iago Valverde asina a peza 'Prieto e Patiño, complementarios', na que analiza as formas de traballar opostas, mais complementarias, de dous arquitectos "moi diferentes": Juan Prieto e Faustino Patiño.

O punto en común que comparten os arquitectos, ademais de formar estudio, é o seu interese pola investigación. Ambos son doutores e foron profesores pero, como é habitual nas súas traxectorias, desde dous enfoques diferentes.

Música, arte e lecer

O apartado musical corre a conta de Fernando Montenegro Herminio González, que traen as últimas novidades e un artigo de González titulado 'Cen anos de Xenakis na Coruña'.

Como vén sendo habitual, o experto en cinema Andrés Castro analiza os filmes máis destacados, a comezar por Welcome to ma maison, de Andrês Goteira, e Anxo Fole ofrece na sección de Cociña un menú de fin de semana: sashimi de salmón, escalopiños de tenreira con mollo de queixo azul galego e mousse de maracuxá.

Noutra orde, Mario Regueira debulla o libro Despois das ondas, de Ernesto Is, mentres Inma Otero Varela analiza Parhelio, de Xosé Luís Mosquera Camba. Aliás, o colectivo Xea dá unha visión da Paradanta do norte, da Franqueira ao Coto da Vella, nunha nova edición do Andar e Ver.

Por último, as dúas páxinas de pasatempos corren a conta de Xerardo R. Roca e Xoán Costa.

Lembra que podes atopar o Sermos Galiza este sábado acompañando o xornal Nós Diario; 64 páxinas por tres euros.

comentarios