CRÍTICA DE CINEMA

'O irlandés', por Andrés Castro

Frank "O irlandés" Sheeran foi un asasino a soldo da mafia italo-americana da costa este dos EUA que aprendeu o oficio servindo en Italia durante a Segunda Guerra Mundial. Agora que é vello lembra a súa vida marcada pola súa participación activa dentro da familia Bufalino e a amizade que tivo con Jimmy Hoffa, líder sindical e activista que desapareceu misteriosamente a finais de xullo de 1975.

irlandes1

Desde a década dos 90, Martin Scorsese acostuma a que as súas longas de ficción non duren menos de dúas horas. O irlandés chega as case tres horas e media. Resulta curioso que, nos tempos que corren, nos que a inmediatez e o ritmo machucón mandan, un filme tan extenso, por riba dirixido a unha plataforma streaming (aínda que se estreara en cinemas), consiga que pase coma un suspiro... Pero claro, a maioría do equipo técnico e artístico que está detrás ten, desde hai tempo, unha praza reservada no Olimpo do sétimo arte.

Steven Zaillan (Óscar por A lista de Schlinder) adapta a novela de non-ficción escrita polo fiscal e investigador Chalres Brandt titulada: Escoitei que pintas casas. Recolle as memorias de Frank Sheeran, un matón da mafia italo-americana que executaba os traballiños encomendados pola familia Bufalino e que tivo unha participación activa na misteriosa desaparición de Jimmy Hoffa.

Frank Sheeran (Robert de Niro), alcumado “O irlandés”, é un tipo honesto ao que non lle custa obedecer ordes. Mentres exercía de transportista fixo boas migas con Russell Bufalino (Joe Pesci), o xefe da mafia de Pittston, Pennsylvania. Pronto se gañou a confianza da familia e comezou “pintar casas” (matar) e tamén a “facer traballos de carpintería” (desfacerse dos corpos). Pouco tempo despois labrou unha grande amizade con Jimmy Hoffa (Al Pacino), o poderoso líder sindical do sindicato de camioneiros.

Ao luxo de contar con Pacino, de Niro e Pesci xuntos, hai que sumarlle a presenza de Harvey Keitel (Taxi Driver), Anna Paquin (O piano), Jesse Plemons (O vicio do poder) ou incluso Steve van Zandt “Little Steven”, o guitarrista da E-Street Band de Bruce Springsteen. Espectacular.

A historia comeza nun asilo onde “O irlandés” pasa os derradeiros anos da súa vida. Alí comeza rememorar a súa apaixonante vida de matón a soldo. Scorsese desprega entón un enorme flash-backs alternado con flash-forwards e máis flash-backs dentro de flashbacks. O quebracabezas vai tomando forma compoñendo un fascinante drama épico sobre a mafia tan profundo e brutal como apaixonante e divertido.

Para dar credibilidade aos saltos temporais, recorreron á maxia de Industrial Light & Magic (ILM) para adaptar os rostros dos actores e actrices a cada período temporal no que se desenrola a acción. O acabado visual é absolutamente brillante, en parte tamén, porque Scorsese fixo fincapé para que a actuación corporal fose acorde coa idade que representaban en cada ocasión. Os departamentos de maquillaxe e perruquería deben estar a tremer...

Após O lobo de Wall Street, Scorsese volve contar con Robbie Robertson para a banda sonora e, por suposto, con moitos e moitas do seu círculo de confianza: a fantástica montaxe de Thelma Schoonmaker (3 Óscars con Scorsese por Toro salvaxe, O aviador e Infiltrados); a espectacular fotografía do mexicano Rodrigo Prieto (Silencio, O lobo de Wall Street); ou a deseñadora de vestiario Sandy Powell (gañadora de 3 Óscars, un con Scorsese por O aviador e nomeada por Gangs of New York e A invención de Hugo).

Após do da Roma de Cuarón, salta á palestra outro filme “orixinal de Netflix” cunha morea de papeletas para optar a varios Óscars. Gañe ou non, a plataforma streaming xa ten asegurada publicidade e cartos para poder seguir con esta estratexia, que lle vai tan ben, de producir un ou dous filmes bos ao ano (neste caso “excelente”) e o resto de oferta cinematográfica cubrila con medianías e filmes de recheo. Visto o visto quizais o trato non sexa tan malo...

The Irishman

(EUA 2019, 209 min.)

Director: Martin Scorsese

Guión: Steven Zaillian

Fotografía: Rodrigo Prieto

Música: Robbie Robertson

Elenco: Robert De Niro, Al Pacino, Joe Pesci, Harvey Keitel, Anna Paquin, Jesse Plemons, Bobby Cannavale, Ray Romano, Kathrine Narducci, Stephen Graham, Jack Huston, Domenick Lombardozzi, Steven Van Zandt

Máis en CULTURA
Comentarios