O festival de contidos dixitais Carballo Interplay despediu este domingo a undécima edición, marcada polo cambio de localización para o Mercado de Carballo, trasladándose ao corazón da vila, e polo recoñecemento ao talento galego emerxente no ámbito audiovisual e dixital.
O domingo tiveron lugar precisamente dous dos momentos máis esperados, o show "CFA. Lasamigas Productions" da man de Carolina Iglesias e Laura Márquez, no que repasaron os seus referentes e inspiracións do mundo audiovisual e dixital. Despois decorreu a entrega de premios, nun acto cheo de risas presentado polo dúo cómico Izquierdo Sisters.
Por primeira vez na historia do festival un proxecto galego obtivo o premio a Mellor Dirección. Así, Irene Pin levouse o galardón, dotado con 200 euros. A webserie Rent-a-pal conta a experiencia de Andrea, unha rapaza que comeza a traballar nun negocio moi singular, unha empresa de aluguer de amigos. O xurado, formado pola creadora de contido dixital Ainhoa Marzol, o cineasta Joel Bassaget e o artista Fran Rodríguez Casal destacou a "resistencia a adaptarse a unha estrutura narrativa fácil e coñecida para tomarse o seu tempo e peitear coidadosamente os anacos contemporáneos da vida".
Este xurado tamén outorgou o premio de Mellor Serie a Historia Mal, dirixida polo andaluz Daniel Cervantes, unha obra de animación coa que lle dan unha volta á historia ou como sinalan os autores, "con máis improvisación que historia". Neste caso o xurado destacouna como "divertida, intelixente e estrafalaria” demostrando que “os cartos non son problema cando se ten talento e coñecemento". O premio económico neste caso é de 800 euros. A serie conquistou tamén ao público que se achegou ao Mercado a coñecela e cos seus votos concedeulle o Premio do Público, de 400 euros. A webserie Bananas, enviada desde a República Checa, recibiu unha mención especial por parte do xurado.
O xurado novo, formado por Afra Torrado, Daniel Valcárcel Colino, Iria Ramos Mesía e o artista Mondra, destacou a webserie china Monster Diner / 怪兽小馆, sobre monstros agochados entre humanos. Este Premio do Xurado Novo conta con 400 euros.
No caso do Premio a Mellor Proxecto de Contido Dixital en Galego, o gañador foi o equipo da serie Delirio Sketch, co seu proxecto de serie de comedia. O Carballo Interplay achegará con este recoñecemento 3.000 euros destinados á produción da serie.
Por último, nesta edición estreouse o Premio a Mellor Creador e Canle de Contido Dixital en Galego. Dez finalistas en ambas categorías, creador ou creadora e canle, presentaron os seus proxectos ante o xurado formado por Gabri Fuentes, Cibrán Tenreiro, Andrea Villa e Marta Salicrú. Finalmente foi María Rúa, coñecida en redes como Prado Rúa, pola súa "autenticidade e carisma especial", destacando a calidade lingüística do seu contido e a "rotundidade" para defender "causas que considera xustas", a gañadora a mellor creadora.
Na categoría de mellor canle o gañador foi o videopodcast O Faiado, realizado por estudantes da Universidade de Santiago de Compostela, por facer coas súas conversas e entrevistas "do local algo universal e viceversa", así como polo dominio da comunicación en redes sociais. O premio económico é de 600 euros en cada categoría.
