Comeza o Carballo Interplay, o punto de encontro da nova creación dixital: todo sobre o evento

“Hai moito tempo que previamos que as novas formas de consumo do audiovisual serían as que efectivamente hoxe se están impoñendo: que prenderiamos unha pantalla, mesmo a dun teléfono móbil, e que poderiamos escoller nela o que quixésemos ver". Sonia Méndez, directora do Carballo Interplay, que deu comezo esta quinta feira á súa undécima edición, púxose á fronte, en 2014, do que chamaron "o primeiro festival de webseries de todo o Estado". O tempo deulle a razón. O Carballo Interplay transformouse axiña no pioneiro punto de encontro das creadoras de contidos dixitais. Os novos modos de enfrontarse ao audiovisual considerábanse daquela un medio superficial, destinado exclusivamente ao lecer da mocidade. Poucos anos despois, ninguén quere quedar atrás no mercado dos contidos dixitais. Dalgunha maneira, un sinal do que está acontecendo é que a xornada profesional que se celebra hoxe está dedicada ás plataformas dixitais nas canles públicas, e nela presentaranse as recentemente inauguradas OTT (é dicir, over the top) da Televisión da Galiza e da EITB, a televisión pública de Euskadi. "As televisións non poden permitirse quedar atrás e precisan estar en constante transformación", explica Méndez a Nós Diario. "Pero ademais, todo o mundo está moi atento ao que sucede noutras plataformas, nas redes sociais, nos podcasts... Isto vai a moita velocidade e hai que estar atentos ao potencial de cada un dos formatos". O Carballo Interplay proxectará 20 webseries de 11 países na súa Sección Oficial, 4 delas estreas galegas Diversificación O arranque do festival contou esta quinta feira coa presenza de, ademais das súas directoras, Sonia Méndez e Andrea Villa; Natividade González, deputada de Cultura da Deputación da Coruña; Xosé Regueira, concelleiro de Promoción Económica e Turismo de Carballo; Evencio Ferreiro, alcalde de Carballo, e Jacobo Sutil, director de Agadic. A sección oficial do festival mostrará 20 propostas procedentes de todo o mundo, e catro delas son galegas: Nómades, dirixida por Marta Insua; Poscoito, de Héctor Rodríguez; Pulp Air, de Anita Pico e Rent-a-pal, de Irene Pin. Unha cifra que, segundo explica Sonia Méndez, "revela o bo momento da creación audiovisual do país". Pero ademais, no Carballo Interplay pódese asistir a podcasts en directo, espectáculos de stand up, a obradoiros sobre creación dixital... A oferta xa sobrepasa con moito aquela primeira edición centrada nas webseries. "É que en pouco tempo as cousas cambiaron moito", continúa Méndez. "Eu agora prefiro falar de series de formato curto porque, que é hoxe unha webserie? En realidade vémolas todas a través de Internet". O encontro de Carballo, porén, céntrase máis en series con maior liberdade creativa, con formatos máis gamberros, como as define Méndez. "As creadoras de contidos, en xeral, buscan a liberdade creativa e a fuxida das canles convencionais. É importante que se vexan algunhas xoias que non están nas plataformas mainstream e que corren o risco de pasar desapercibidas Non obstante, agora mesmo xa existe moita mestura en canto aos medios de expresión: unha das series a concurso, por exemplo está realizada por unha televisión checa". A Zona Pro do Carballo Interplay debaterá a creación de plataformas dixitais nas canles públicas O dixital é político Xustamente por ese rodopío de ideas e tendencias que xorde do mundo dixital, o Carballo Interplay tamén quere ser un lugar de reflexión e debate, dándolles voz aos protagonistas. Así, ademais de falar das novas OTTs nas televisións públicas, tamén se analizará o éxito da rexouba e a nostalxia na rede cos xornalistas Juan Sanguino, Raquel Piñeiro e Anxo F.Couceiro; ou do estado dos podcast e webseries co investigador e director de Estación Podcast Nacho Gallego e co cineasta Joël Bassaget. Pero ademais, o festival destaca pola atención que lle presta aos contidos sociais e políticos. Deste modo, na xornada do sábado 6 de abril terán lugar tres mesas redondas para falar da nova internet co activismo e a política como temas centrais. Na xornada da mañá analizaranse as últimas tendencias na rede, nun panel no que analistas e curadoras expertas en tendencias responderán unha cuestión que titula a conversa: E se imprimimos internet? Participarán Marina G Canedo, Álvaro L Pajares, creador de contido de contas como Policía del Afecto; Rafa López, creador da conta afirmacion.es, e Ainhoa Marzol, comunicadora e curadora das tendencias na rede na súa newsletter Gárgola Digital. O panel O dixital é político, centrarase en como as xeracións X e Z constrúen lazos e traballan alternativas dende o dixital. Participarán Iván Iglesias, fundador do medio ourensán OU Ké!, Román Varela, un dos fundadores do podcast galego Carretando; Alan Barroso, experto en comunicación política e creador de contido en redes; Sergio Gregori, xornalista, analista político, secretario xeral do Sindicato de Periodistas de Madrid e director de Furor TV; Ayme, divulgadora de política, feminismos e política social; e Marina Lobo, guionista, presentadora e cómica, do equipo de Spanish Revolution. Tamén haberá oco para coñecer o traballo de colectivos organizados como Pantube, un movemento de creadores e creadoras de contidos dixitais de esquerdas. Participarán neste panel, que leva o nome de Pantube: tell me more, Proyecto Una, un colectivo que nace na rede para "desenmascarar as novas formas de fascismo", Alba Lafarga -xestora cultural e divulgadora en Youtube- e Oriol Erausquin (Infusión Ideológica), creador de contido en redes e do podcast Tajos Verdes. O Carballo Interplay xa está aquí: olla todas as novidades da programación O galego como vehículo O Carballo Interplay, ademais, está volcado na creación de contidos en galego que, en palabras da directora, "xa forma un ecosistema moi rico. Existe toda unha serie de creadoras que traballan dunha forma moi interesante e que crean contidos en galego. de feito, ao contrario que cando comezamos, agora podemos desenvolver unha parte moi importante do festival en galego, e en diferentes plataformas, desde Tik Tok até as webseries”. Porén, advirte Méndez, "nós funcionamos como un lugar de exhibición e de encontro, pero ese ecosistem hai que mantelo. Hai que atopar a forma de implementar axudas á produción por parte das institucións -antes había unhas subvencións da Axencia Galega de Industrias Culturais, por exemplo, que desapareceron- e propiciar que haxa pontes co mundo profesional para que as creadoras poidan mellorar as súas produción, pechar ciclos que leven a unha maior profesionalización". A moza que abortou e o contou O Carballo Interplay tamén axuda á creación en galego na súa sección de pitching, na que o premio a proxectos que convoca o Concello de Carballo outorga 3.000 euros para produción. Precisamente esta quinta feira estreouse a gañadora do ano pasado, A moza que abortou e que o contou, de Eire Cid e Rosalía Quiroga, a historia dunha moza que decide contar á súa familia que abortou durante un encontro no Nadal, desatando debates que a súa irmá pequena grava co teléfono.