O mural de gran formato titulado 'Corrección política', obra do artista e muralista galego Sokram -membro do colectivo Dios ke te crew- vén de ser recoñecido como a terceira mellor creación artística desta tipoloxía a nivel internacional.
Así o sinalou a plataforma Street Art Cities, unha das máis recoñecidas e prestixiosas neste ámbito artístico.
De feito, o colectivo abriu o concurso a votacións e o artista de Ordes conseguiu convencer ao público.
Foi a principios do mes de outubro cando se soubo que a creación estaba entre os finalistas pero, unha vez feito o reconto, a proposta quedou a terceira do mundo, algo do que se fixeron eco nas súas redes sociais quer o propio muralista, quer o colectivo Dios ke te crew.
Con esta peza, que pode ser visitada na localidade de La Bañera, en León, Sokram pretende chamar a atención sobre a crecente "represión" na sociedade, que dificulta o dereito á liberdade de expresión.
De feito, houbo certa ligazón da obra cos casos de cantantes como Valtònyc.
Para as e os fanáticos da arte do grafito e o muralismo, algunhas das obras de gran formato de Sokram poden ser visitadas, por exemplo, nas vilas de Ordes e Carballo.
Malia ser un artista con cada vez máis proxección fóra da Galiza, o membro do colectivo Dios ke te crew continúa a ser un habitual dos certames Rexenera Fest -no marco da iniciativa Derrubando muros con pintura- e Desordes Creativas.