O Festival Rosalía volta a Compostela con dous días de actividades

Ogalego é o noso superpoder” é o lema elixido pola área de Normalización Lingüística da Deputación da Coruña para o Festival Rosalía, que organiza o ente provincial en colaboración co Concello de Santiago de Compostela. As actividades comezarán esta sexta feira, día 24, e continuarán tamén o sábado. Desenvolveranse en distintos espazos da cidade vella compostelá, como a praza de Cervantes, o Teatro Principal, o Centro Sociocultural Maruxa e Coralia e o Colexio Maior Santo Agostiño. Nesta nova edición, o festival incrementa a programación, estendéndose a dúas xornadas, cunha serie de eventos pensados “como unha oferta activa, na que poder participar, xa non só como público senón tamén percorrendo a cidade para redescubrir a Compostela rosaliana”. Máis de 45.000 'Caldos de Gloria' para Rosalía Así o indica a deputada provincial de Normalización Lingüística, María Muíño, quen engade que “tratamos de celebrar todas as facetas da figura de Rosalía, tanto como autora e poeta, como feminista, botando man das nosas creadoras actuais”. Pola súa parte, a concelleira de Acción Cultural de Santiago, Mercedes Rosón, destaca que é este "un festival de mulleres, no que a programación está principalmente composta por elas”. Unha das actividades previstas para esta sexta feira é o paseo literario polos lugares da cidade que marcaron a vida da poeta da man da profesora Mercedes Espiño e autora da obra Espazos de Rosalía en Compostela. Espiño explica a Nós Diario que a finalidade do roteiro é “reivindicar a compostelanidade de Rosalía” e considera necesario lembrar que “Santiago foi un lugar importante [para a poeta], onde naceu e viviu a metade da súa vida”. Engade que reclamar unha Rosalía compostelá “non vai en contra da vinculación con Padrón”, senón que “é unha unión”. Os roteiros literarios son unha proposta moi aclamada pola poboación dado o seu interese cultural. Espiño argumenta ao respecto que “a xente quere visitar os lugares onde viviron poetas ou escritores e escritoras” de relevancia porque lle gusta pensar que nesa casa na que se atopa ou nesa rúa pola que camiña tamén estivo Rosalía. Estes paseos son unha forma “de achegar a literatura ás persoas”. Un roteiro rosaliano no ensino Nesta mesma liña desenvólvese a ruada rosaliana que ten preparada a compañía Os Quinquilláns. Tero Rodríguez convértese en Rosalía de Castro e, xunto a Lucho Penabade interpretando a Modesto Brocos -o pintor compostelán que retratou a poeta- e o músico Luís ‘o Caruncho’, percorrerán a cidade nunha actividade chea de música e historia. “Queremos que se saiba que Rosalía e Compostela teñen unha vinculación moi directa, como así está recollido nos seus poemas”, explica Penabade a este xornal. O interesante da figura de Rosalía, indica, é que “por moito que se estude, sempre aparece algo novo”. Estes festivais permiten trasladar os seus poemas á actualidade, “pois son temáticas aínda vixentes: as diferenzas entre homes e mulleres, a inmigración, as desigualdades económicas, mesmo as enfermidades”, engade. Unha performance espida e transparente Pola súa parte, Ugia Pedreira e Marina Oural realizarán o sábado unha performance titulada 1 faba, 1 vida, unha proposta “transparente co mundo emocional e co estado de ánimo, tanto noso como do público”, indica Pedreira. Cos poemas de Marina e a música de Ugia, as artistas ofrecen un “espectáculo espido, con letras propias e sen amplificacións”, engade Oural. A novidade é que o espazo de interpretación estará ligado a poemas de Rosalía; “unha Rosalía rebelde, apaixonada e enfadada, que sabe berrar e que o fai con ben ditas palabras”, sostén Pedreira. Festival Rosalía, dúas xornadas para celebrar o 'súper poder' do galego Con respecto ao festival, Oural opina que nace nun contexto necesario para a posibilidade de crear novas realidades, pero xunto a unha figura “que sempre está ao noso lado dicindo: iso xa o escribín eu”. Ademais, tamén permite atender “todas as mulleres que viven grazas ao seu pensamento, a outras Rosalías compoñedoras de vida e de obra”, engade Pedreira. As crianzas tamén terán actividades dirixidas a elas como o espectáculo Chove miudiño de Sole Felloza. En conversa con Nós Diario, Felloza sinala que mestura a narración oral e os versos de Rosalía baseándose no poema “Caldo de gloria”. “Mentres o caldo se prepara, a protagonista lembra, a través das obras da poeta, outros tempos de verán e xogos; e remata coa degustación do propio caldo e boliños do pote”. Con esta obra, Felloza busca que as crianzas entendan a poesía como un reflexo das emocións resultantes de acontecementos cotiáns. “Rosalía conseguiu converter cousas moi pequenas en versos marabillosos”. Así, Chove miudiño é unha caixa de sensacións na que poder xogar a ver o mundo a través dos ollos da poeta. Manifesto da AELG no Día de Rosalía de Castro 2023 “As crianzas son moi conscientes da relevancia de Rosalía, é a súa referencia poética e é marabilloso que a porta da poesía estea aberta por alguén deste nivel”, indica, “todo o que fagamos arredor da súa figura -como este festival- é fundamental” e engade que “non de calquera poeta podemos facer un evento enteiro”. Paseos, música teatro e recitais completan o evento rosaliano A programación do Festival Rosalía amplíase a dúas xornadas. A sexta feira, ás 17.30 horas, na praza de Cervantes, abrirá a feira de produtos que teñen a poeta como inspiración e Super Rosalía dará a benvida. Media hora despois, Larraitz Urruzola representará A viaxe de Rosalía e ás 19 horas decorrerá o roteiro con Mercedes Espiño, con saída da mesma praza, onde ás 20.30 horas soará a música de Adhara &amp; Rithman. A xornada do sábado comezará ás 12 horas en Cervantes coa apertura da feira de produtos rosalianos e a visita de Super Rosalía, e ás 12.30 horas será a quenda do recital musicado por Faia, no colexio maior de Santo Agostiño, Primavera vai chegar, co que repite ás 13.30 horas. Ás 13 horas, decorrerá o roteiro rosaliano de Os Quinquilláns, con saída da praza de Cervantes, e ás 16.30 horas na mesma praza actuará Sole Felloza con Chove miudiño. Ás 17.30 horas, no mesmo lugar, será o faladoiro O feminismo en Rosalía: máis un superpoder, con María Xesús Lama, Carme Adán e María Reimóndez. Ás 18.30 horas, no CSC Maruxa e Coralia, Ugia Pedreira e Marina Oural ofrecerán 1 faba, 1 vida, e unha hora despois, na praza de Cervantes, decorrerá o recital poético de Andrea Nunes, Ánxela Lema, Lucía Aldao e Diana Kurichm. O festival remata no Teatro Principal, ás 20.30 horas, co concerto de O Val das Mouras.