O Entroido encamiña o seu final cos festexos do Mércores de Cinza, que encherán vilas e cidades de "enterros" e "funerais" rendendo homenaxe a "Felipes", mecos e sardiñas.
Esta terza, con todo, decorreu un dos días grandes da festividade, con desfiles e concursos de disfraces e actividades. Entre as localidades que acolleron celebracións está a parroquia de Covelo, no municipio de Melón (comarca do Ribeiro), onde os tradicionais mordomos e danzantes pelexaron por roubar e rescatar a coroa do rei do Entroido durante a procesión do santo Entroido e a santa Entroida.
Continuaron tamén as actividades no "triángulo máxico" do Entroido galego: Verín, Laza e Xinzo. Así, as rúas de Verín enchéronse onte co derradeiro desfile de máscaras, disfraces e grandes doses de humor.
En Laza (comarca de Verín), saíron os peliqueiros veteranos para darlle paso, na sesión vespertina, ao testamento do burro, ao enterro do Entroido e ao loito das máscaras tradicionais desta vila. Da mesma maneira, acolleu o "Gran Desfile do Entroido 2024" Xinzo (comarca da Limia), vila que conta co ciclo máis longo dos Entroidos europeos, o cal rematará o día 18 de febreiro, domingo de piñata.
Máis non só no interior pervive o Entroido. Na parroquia de Cobres, en Vilaboa (comarca de Pontevedra), os ancestrais Galáns e Madamas saíron bailar polos barrios, mentres que, pola tarde, tivo lugar a Corrida do Galo, acto principal do gran día do Entroido de Cobres.
Voda da Pita
No lugar de Eiroás, na parroquia ourensá de Cudeiro, decorreu tamén o día grande do Entroido de Eiroás, protagonizado por un curioso festexo: a Voda da Pita. Unha representación teatral popular satírica que lembra a "cinzarrada" que puido ser a orixe deste Entroido. Coñecido como "Festa da Pita", o de Eiroás conta coa súa propia máscara desde o ano 2001: a Pita.
