As perseidas, coñecidas popularmente como bágoas de San Lourenzo, son unha choiva de meteoros que se produce anualmente entre xullo e agosto, e que estes días serán especialmente visíbeis na Galiza.
Cando ver as perseidas?
Malia que nestas datas xa se poden albiscar estrelas fugaces no ceo durante a noite, o mellor momento, segundo as predicións astronómicas, é entre esta quinta feira, 11 de agosto, e o sábado, día 13.
O día de maior actividade será na madrugada do 12 ao 13 de agosto, se ben a lúa chea que imperará esta sexta feira pode dificultar a súa visibilidade.
A probabilidade de ver os meteoros batendo contra a atmosfera medra conforme avanza a noite, e arredor das 4 e 5 horas da madrugada sería máis doado presenciar este fenómeno astronómico.
Onde podo ver a choiva de meteoros?
A contaminación lumínica é unha importante traba para detectar as perseidas, polo que cómpre afastarse dos lugares máis afectados das cidades e buscar un sitio o máis elevado e escuro posíbel para contemplar o ceo nocturno.
Aliás, entidades como a Asociación Astronómica Sirio ou a Agrupación Ío organizarán eventos para ver as perseidas, no Observatorio Astronómico de Cerdedo-Cotobade no primeiro caso e en Muras no segundo, na madrugada da sexta feira ao sábado.
Nesa mesma data o Concello de Ponteareas organiza unha actividade no Castro de Troña, e a Casa das Ciencias da Coruña permite toda esta semana asistir á choiva de meteoros desde as súas instalacións.
O certificado Starlight
Retomando o caso de Muras cómpre salientar que o concello conta co certificado Starlight, outorgado pola fundación homónima e que garante unha "excelente calidade" da visualización do ceo.
Na Galiza, alén de Muras, teñen a certificación de 'destino turístico Starlight' o parque nacional das Illas Atlánticas e Pena Trevinca. Aliás, o Faro de Avión é denominado 'paraxe Starlight', polo que estes son tamén lugares óptimos para gozar das perseidas.