La bestia negra, da compañía asturiana Proyecto Piloto, e Fronterizas, da cántabra Mari Paula Danza & Performance, serán os espectáculos que pecharán esta fin de semana o circuíto de exhibición do CEN, nomeado Itinerario Constelacións. O programa cultural despedirase até o ano que vén das localidades galegas.
A primeira das citas desta fin de semana chegará a sexta feira 20. A compañía Proyecto Piloto presentará en Lugo La bestia negra, un espectáculo que pon sobre a mesa a histeria (do termo “hestera”, que significa útero) que, no seu día, “se consideraba como unha gran besta negra que atemorizaba a todos os médicos”, segundo a compañía.
La Salpêtrière é hoxe en día un hospital máis de París, pero a finais do século XIX foi un lugar habitado por 4.000 mulleres que vivían entre a realidade do seu día a día e a representación teatral, exaxerada, exhibicionista e fotografada da súa suposta enfermidade: a histeria. “Esta obra é unha homenaxe a todas elas, pero tamén un intento de entendelas e, aínda máis, de querelas”, sinala Proyecto Piloto.
O domingo 22, a escena trasladarase á Cidade da Cultura, onde Fronterizas, unha obra autoficcional da bailarina, coreógrafa e xestora cultural brasileira Mari Paula (Mariana de Paula Ferreira) aborda temas como a loita, o cansazo ou a aceptación do fracaso. Cunha estrutura narrativa non lineal, Fronterizas albisca un futuro a partir de anacos rotos do pasado e pecha, deste xeito, a triloxía integrada por Retrópica (2017), peza coa que acadou en Brasil o Premio Nacional de Danza - Funarte Klauss Vianna, e Devórate (2019).
ESADs en camiño
Previamente, Mari Paula participará nunha nova edición das actividades paralelas ESADs en camiño, o proxecto de colaboración e intercambio profesional e educativo coas escolas superiores de Arte Dramática da Galiza, Asturias e Euskadi (Dantzerti), que permite por en contacto ao alumnado das ensinanzas artísticas coas compañías profesionais en xira co CEN.