Foliada no Inferno (Ernie records, 2024) é o sexto disco longo do dúo Boyanka Kostova, bandeira do novo rap en galego. O disco preséntase como "un tratado de escarnio e maldizer", e nel, o Chicho do Funk (Ortiga) e Cibrán García maldín todos os males do seu tempo: as relacións sociais, as drogas, o desamor... mais sempre desde o escarnio, mantendo o seu característico toque de humor retranqueiro nas súas letras.
Hai menos dun ano o dúo publicaba o seu anterior LP Os meus peidos cheiran a pétalos perfumados? (Ernie Records, 2023) co que aínda poden gañar o Premio Min a Mellor Álbum en Galego. Agora aparece esta nova referencia, afastada do son do anterior traballo, cun resultado moito máis ecléctico e nun traballo máis longo (11 temas fronte aos 10 do anterior) e que xa desde a portada representa unha antítese co do ano pasado.
Colaboracións especiais
Foliada no inferno conta, ademais, coa colaboración de recoñecidos artistas, como Camel Blando e O.G. de FO Records no tema "Porralume". Do ámbito da música tradicional cabe destacar a presenza de artistas como o gaiteiro David Bellas, a pandereiteira Marina Vidal e o músico Manuel Pardo no tema que dá nome ao disco.
Noite e misterio dan forma ao universo deste novo disco, que saíu á luz este 4 de abril. O último lanzamento segue a ofrecer pinceladas do álbum máis ecléctico da súa ampla traxectoria. Será o vindeiro 20 de abril cando Boyanka Kostova leve este escurantismo á Sala Capitol (Santiago de Compostela) para presentar o álbum. As entradas para este concerto xa están dispoñíbeis.
