"O museo ten que explicar o que é a sociedade galega actual, niso traballamos"
Manuel Vilar (Muxía, 1956) coñece o Museo do Pobo Galego practicamente desde a súa inauguración, en 1977. Primeiro como visitante habitual, máis tarde como socio e colaborador. A partir do mes de xullo, será o director da institución que, entre outras cousas, mantivo a memoria do Seminario de Estudos Galegos. A apertura nacional –“non pode ser unicamente un museo de Santiago”–, a relación entre patrimonio e democracia, e dar conta da Galiza actual son as súas primeiras e principais preocupacións. Eis un extracto da conversa, publicada no número 351 do semanario en papel Sermos Galiza.
Manuel Vilar, escollido novo director do Museo do Pobo Galego
Licenciado en Xeografía e Historia e mestrado en Xestión de Patrimonio Cultural, Manuel Vilar asume a dirección do Museo do Pobo Galego tras nomealo, por unanimidade, o padroado da entidade.