Os recortes aplicados nestes anos polos gobernos de Núñez Feixoo traducíronse no encarecemento para as familias dos gastos ligados ao inicio do curso escolar. Denúnciao o BNG, que lembra que Galiza era un dos territorios do Estado onde a ‘volta ao cole’ era menos cara. Porén, indica, isto mudou, embora que os salarios e ingresos continúen á cola do estado. O Bloque anuncia que presentará unha batería de medidas no Parlamento para alixeirar a actual carga económica dese inicio do curso. A portavoz nacional, Ana Pontón, mantivo un encontro cunha delegación da Plataforma galega en defensa do ensino público.
As políticas de Feixóo implicaron unha asfixia do ensino público e en dez anos hai un recorte acumulado de 2.000 millóns euros
Entre esas medidas, o BNG propón recuperar a gratuidade dos libros de texto ao 100%, que suprimiu o Goberno do PP. “As políticas de Feixóo implicaron unha asfixia do ensino público e en dez anos hai un recorte acumulado de 2.000 millóns euros, pecháronse 136 escolas unitarias e 876 unidades, e neste curso hai menos docentes que antes da chegada do actual presidente da Xunta”, denunciou Ana Pontón.
A estes datos súmanse, engade, aos prexudiciais efectos da LOMCE en termos de desgaleguización, de deterioro dos dereitos de profesorado e alumnado, a tendencia cara un “ensino elitista e clasista”.
A redución da ratio de alumnado por aula en todos os niveis, propoñendo que non supere a cifra de 15 escolares na etapa infantil, 20 na etapa de ensino obrigatorio e 25 nos cursos de bacharelato, incluíndo ao alumnado que repita curso; é outra das medidas propostas polas nacionalistas Ademais, a formación nacionalista demanda derrogar a LOMCE e, no que se refire ao ensino universitario, propón incrementar o financiamento das universidades en 30 millóns á marxe da negociación para un novo plan de financiamento.
Lei mordaza na Cámara
Na súa comparecencia ante os medios, a portavoz nacional tamén fixo referencia ás normas de utilización das salas do Parlamento e sobre a vestimenta que pretende aprobar o PP. A preguntas dos medios, Pontón atribuíu estas normas remitidas aos grupos por parte da Presidencia da Cámara a un “delirio autoritario do PP que confunde maioría absoluta con absolutismo”, tentando impoñer unhas normas que cualificou de “lei mordaza tanto para os deputados e deputadas como para o conxunto da cidadanía á que, de prosperar, impediría expresarse con liberdade ou facer nada no Parlamento”.
